Çулсерен декабрĕн 9-мĕшĕнче Пĕтĕм тĕнчери коррупципе кĕрешмелли куна паллă тăваççĕ. Ăна общество коррупци проблемине тимлĕх уйăртăр, çак усал ĕç пуçне ан çĕклейтĕр тесе тата унпа кĕрешес тĕллевпе йĕркеленĕ.
Пĕтĕм тĕнчери коррупципе кĕрешмелли куна халалласа ЧР Цифра аталанăвĕн, информаци политикин тата массăллă коммуникацисен министерстви ЧР Пуçлăхĕн Администрацийĕпе пĕрле регионти массăллă информаци хатĕрĕсем, ĕç тăвакан влаç органĕсемпе вырăнти хăйтытăмлăх органĕсен пресс-службисемпе семинар ирттерчĕç. Унта коррупцие хирĕç кĕрешес сферăра информаци ĕçĕ-хĕлне мĕнле йĕркелесе пурнăçламаллине ăнлантарчĕç.
Семинар ĕçне ЧР прокуратурин коррупципе кĕрешесси çинчен калакан саккуна пурнăçланине тĕрĕслекен пай пуçлăхĕ Денис Александрович Васильев хутшăнчĕ.
Патшалăх тытăмĕнче, тĕрлĕ сферăра коррупциллĕ преступленисемпе кĕрешесси вăй илсех пырать, ку енĕпе ĕç кăтартăвĕсем те лайăхланаççĕ. Денис Александрович палăртнă тăрăх, коррупциллĕ преступленисен шутĕнче взятка парасси уйрăмах анлă сарăлнă. Ку вăл халĕ, Çĕнĕ çулхи уявсем умĕн, уйрăмах актуаллă. Муниципалитет пурлăхĕпе усă курас, аукционсем ирттерес енĕпе саккуна пăснă тĕслĕхсем çук мар. Патшалăх тата муниципалитет влаç органĕсен ĕçченĕсем тупăш декларацийĕсене туллин тата тĕрĕс хатĕрлеменни те тĕл пулать. 2024 çулта ку тĕлĕшпе 79 тĕрĕслев ирттернĕ, саккуна пăсакансене явап тыттарнă.
Массăллă информаци хатĕрĕсен тивĕçĕ — коррупциллĕ преступленисемпе вĕсен тĕсĕсем пирки çынсене пĕлтересси, коррупцие хирĕçле ĕç-хĕлĕн проблемăллă ыйтăвĕсене çĕклесси, коррупципе кĕрешсе пурнăçланă ăнăçлă ĕçсем пирки каласа парасси тата ытти те. Семинарта çак тата ытти самантсем çинче тĕплĕн чарăнса тăчĕç.
Ирина ДАНИЛОВА
