Кăçал Чăваш Енре Çĕнтерÿ парачĕ, ветерансен портречĕсене тытса пĕрле йышлăн пухăнса утмалли «Вилĕмсĕр полк» акци, Çĕнтерÿ салючĕ пулмĕç. Çак йышăнăва республикăра пурăнакансен тата кунта хăнана килекенсен хăрушсăрлăхĕшĕн тунă.
Чăваш Ен Пуçлăхĕ Олег Николаев палăртнă тăрăх, уяв мероприятийĕсем урăх форматпа пулĕç. Онлайн йĕркепе «Вилĕмсĕр полк», «Çĕнтерÿ чÿречисем», «Ветеран патне — шăнкăрав», «Çĕнтерÿ ялавĕ умĕнчи часовой» тата ытти акцисем иртеççĕ. Сăмах май, «Вилĕмсĕр полк» акцин çĕнĕ формисене пурнăçа кĕртме сĕннĕ: Аслă Отечественнăй вăрçă участникĕсен портречĕсене обществăлла, харпăр хăйĕн, ĕçри транспорчĕ çине, унсăр пуçне урамри медиаэкрансемпе вĕрентÿ заведенийĕсенче, социаллă сетьсенче вырнаçтарма. Апрель уйăхĕнче Вăрмар муниципаллă округĕнче те Çĕнтерÿ кунĕ çывхарса пынă ятпа «Георги хăйăвĕ» акци старт илчĕ. Ку акци йăлана кĕнĕ йĕркепе 2005 çултанпа çĕршывĕпех иртет. Акци «Эпĕ астăватăп, эпĕ мухтанатăп» девизпа иртет. Унăн тĕп символĕ — хура тата тĕттĕм сарă тĕслĕ лента — Аслă Отечественнăй вăрçăри Çĕнтерĕвĕн тĕп атрибучĕ. Çак лентăпа Аслă Отечественнăй вăрçăри чи пысăк наградăна — Мухтав орденне — тунă чухне усă курнă. Акци тĕллевĕ — çамрăк ăрăва иртнĕ ĕмĕрти чи хăрушă вăрçăри çĕнтерÿ мĕнле хака ларнине, кампа мухтанмаллине аса илтерсех тăрасси. Вăрмар шкулĕнчи волонтерсем акци вăхăтĕнче поселокри çынсене тата унăн хăнисене майăн 9-мĕшĕн тĕп символне — Георги хăйăвне — 500 штук парса тухрĕç. Георги хăйăвĕ — уяв символĕ, çак хăрушă вăрçăра Çĕнтерĕве туптанă ветерансене, тыл ĕçченĕсене хисеплесе асра тытмалли символ. Хăйăва кăкăр çине сулахай енне, чĕре енне çакмалла.
Округра пурăнакансем, çав шутра Пысăк Енккассинчи вăтам шкулта та «Георги хăйăвĕпе» пĕрлех «Çĕнтерÿ чÿречисем» акцие те хутшăнаççĕ. Шкул ачисемпе ашшĕ-амăшĕсем класри, килĕсенчи чÿречесене Çĕнтерÿ кунĕ ячĕпе илемлетрĕç.
Аслă Çĕнтерÿ 79 çул тултарнине халалласа майăн 9-мĕшĕнче Вăрмарти Г.Е.Егоров ячĕллĕ вăтам шкул территорийĕнче çак шкултан вĕренсе тухнă, Тăван çĕршывшăн пуçĕсене хунă салтаксене халалласа «Защитники Отечества» ятпа аллея уçма палăртаççĕ. Çак пархатарлă ĕçе Вăрмар округĕн администрацийĕн, вĕрентÿ учрежденийĕсен коллективĕсем, районти ытти çынсем хăйсен тÿпине хывнă.
Эвелина МИХАЙЛОВА хатĕрленĕ
