Чăваш Республикин 2024-2025 сезонри футзал енĕпе мала тухмалли ăмăртăвĕсен финалти юлашки турĕнче иккĕмĕш дивизионра «Вăрмар» ФК» команда Çĕнĕ Шупашкарти «Кăйкăр» ФК» командăпа тĕл пулнă.
Пĕрремĕш тайм вăрмарсемпе çĕншупашкарсем хушшинче 0:2 шутпа вĕçленнĕ. Паллах, ку пирĕннисене тивĕçтермен. Çавăнпа вĕсем хăйсене алла илсе иккĕмĕш таймра 8 гол тапса кĕртнĕ. Çапла вара «Вăрмар» ФК» команда 8:2 шутпа çĕнтерсе Чăваш Республикин чемпионĕ пулса тăнă.
Ăмăртусен пĕтĕмлетĕвĕ тăрăх «Чи лайăх хÿтĕлевçĕ» ята «Вăрмар» ФК» командăри Павел Теплов, вăлах команда тренерĕ, тивĕçнĕ. «Чи лайăх вăйăçă» ята «Вăрмар» ФК» командăри Евгений Петрова панă.
Çавăн пекех Николай Николаева та палăртмалла. Вăл футзал енĕпе мала тухмалли ăмăртусене хутшăнса мечĕке пурĕ 14 хут тапса кĕртнĕ. Александр Титов вара мечĕке 12 хут тапса кĕртнĕ. Çапла вĕсем ăмăртусен иккĕмĕш тата тăваттăмĕш бомбардирĕсем пулса тăнă.
Команда тренерĕсем Павел Теплов тата Денис Петров, çавăн пекех команда руководителĕ Сергей Лушин çак пысăк çĕнтерÿ ячĕпе саламлă сăмахсене тивĕç. Малашне те ентешĕмĕрсем ăнăçусем тăвасса шанатпăр. Пурне те футболла выляма, футбол вăййипе туслашма чĕнсе калатпăр!
Павел ТЕПЛОВ, А.Ф. Федоров ячĕллĕ Вăрмарти спорт шкулĕн футбол уйрăмĕн тренерĕ
