OA«Кĕрхи пуянлăх – хĕл каçмалăх», – тенĕрен çĕр ĕçченĕ çĕнĕ çул пуçлансанах ытлă-çитлĕ тупăш илессишĕн тăрăшма тытăнать. Тăрăшни вара нихăçан та сая каймасть, çĕр-аннемĕр хăйне хисепленине питех те юратать, тупăшпа тавăрать.

Кĕрхи тухăçа пуçтарса кĕртсен, çĕр çинче вăй хуракансене чаплă уяв кĕрекине ларсах мухтаççĕ. Иртнĕ кунсенче районта ял хуçалăх тата тирпейлекен промышленноç ĕçченĕн кунне уявларĕç. Çĕр çинче ырми-канми тăрăшакансем çак уява чăннипех те тивĕçлĕ.

Кăçалхи çанталăк ял хуçалăх ĕçченĕсене чăннипех те чи йывăр экзамен тыттарнăнах туйăнчĕ. Çуркунне шăрăх пулчĕ, унтан çĕр типсе асапланчĕ, каярахпа çумăрĕ лÿшкентерме тытăнчĕ. Пĕрчĕллĕ тата пăрçа йышши культурăсене мĕн çитĕннине пухса кĕртсе ĕлкĕрчĕç, тухăçĕ те аван пулнине палăртрĕç аграрисем. Шел пулин те, йĕпе-сапана пула çĕр улми самаях шар курчĕ. Районти ял хуçалăх ĕçченĕсем, темле йывăрлăх умĕнче те алла усса ларма хăнăхманскерсем, вăй çитнĕ таран кĕрхи пуянлăха сутмалăх та, çимелĕх те, вăрлăхлăх та пухса кĕртме пултарчĕç.

Уяв кунĕ районти культура çурт­не халăх нумай пуçтарăннă. Кунта килсе кĕрсенех фойере чылай ял тăрăхĕсем хатĕрленĕ хăйсен территорийĕсенчи ал ĕç ăстисен выс­тавкисемпе паллашрĕç. Çавăн пекех уяв хăнисем районта туса кăларакан пылак шыва тутанса пă­хма пултарчĕç, унсăр пуçне «Энĕш» хресчен /фермер\ хуçалăхĕн продукцине туянчĕç.

Ял хуçалăх ĕçченĕсене халалланă чаплă мероприяти пирĕн район 95 çул тултарнă тĕле ÿкернĕ фильма презентациленинчен пуçланчĕ. Ку фильмра район пурнăçĕ алă тупанĕ çинчи пекех туллин те уçăмлăн палăрчĕ. Республикăра иртнĕ «Лучшие на селе» конкурса хутшăнса çĕнтернĕ ачасене те уяв программинче тĕрлĕ наградăсемпе хав­халантарчĕç. Аслисем уй-хирте тăрăшнă чухне ĕç çумне çыпăçнă шкул ачисем те урамра çил хă­валаса çÿремеççĕ. Мĕн авалтанпах ашшĕ-амăшĕсемпе пĕрле ачасем тĕш-тырă пуçтарнă çĕре хутшăнаççĕ е хăмла татма та васкаççĕ, çĕр улми те пуçтарма хирĕç мар. Кăçал та ачасем ял хуçалăх ĕçне активлă хутшăнни палăрчĕ, вĕсене çĕр улми пуçтарнă çĕре хутшăннăшăн тав хучĕсемпе чысларĕç.

Районти агроволонтерсем те хăй­сем Раççее тата Чăваш Ене, çавăн пекех хамăр района юратнине, çĕр ĕçне, ял пурнăçне хисепленине юрă-ташă урлă палăртнине курма кăмăллă пулчĕ.

Район администрацийĕн пуçлă­хĕн заместителĕ – ял хуçалăхĕпе экологи пайĕн начальникĕ Николай Михайлович Николаев аграрисем кăçалхи çулта мĕн ĕçленипе тĕплĕн паллаштарчĕ /тĕплĕнрех 2-3-мĕш страницăсенче вулăр/. «Сăмах па­ян хирти тĕш-тырă пирки мар, пÿл­мене мĕн кĕрсе выртни пирки пырать. Пÿлмене кĕриччен сахал мар тăрăшма тивет. Кун пирки харпăр хăй ĕçлесе курнă, йывăрлăха кашни хăйĕн ĕнси çинче тÿснĕ çынсем кăна ăнланаççĕ. Сире çĕр ĕçне чунтан парăннăшăн чĕререн тав тă­ватăп, ĕçре ăнăçу сунатăп», - терĕ Николай Михайлович хăйĕн сăмахĕнче.

Районти агропромышленноç комплексĕн ĕçченĕсен ĕç-хĕлне район администрацийĕн пуçлă­хĕ Д.Иванов пĕтĕмлетрĕ. «Ĕççи-2022» кăтартăвĕсем тăрăх палăрни­се­не Хисеп грамотисемпе тата хак­лă парнесем парса хавхалантарчĕç. Çавăн пекех ял ĕçченĕсене Вăрмарти муниципалитет округĕн депутачĕсен Пухăвĕн председате­лĕ Ю.Иванов, Чăваш Республикин ял хуçалăх министрĕн заместите­лĕ С.Фролов, Чăваш Ен Патшалăх Канашĕн депутачĕ Л.Пронин, Вăрмарсен Шупашкарти ентешлĕхĕн президенчĕ И.Аверья­нов, Чă­ваш Рес­публикинчи ипотека корпорацийĕн клиентсемпе суту-илÿ енĕпе ĕçлекен департаменчĕн директорĕ Д.Круглов уяв ячĕпе саламласа ăшă сăмахсем каларĕç. Ĕçре уйрăмах палăрнисене уявра тĕрлĕрен наг­радăсемпе хаклă парнесем парса хавхалантарчĕç. Сăмахран, Энĕш­пуçĕнчи «Иванова О.А.» хрес­чен /фермер/ хуçалăх пуçлăхĕ Ольга Анатольевна 3 ача амăшĕ. Пĕр вăхăтрах вăл ачисене те тĕрĕс воспитани парасси­шĕн ырми-канми тăрăшать, мăшăрĕпе çĕр ĕçĕнче ĕçлесе пур енĕпе те ĕлкĕрсе пынине палăртрĕç уявра. Ку вара уншăн Ял хуçалăх тата тирпейле­кен промышленноç ĕçченĕн кунĕн­че те, çывхарса килекен Амăшĕн кунĕ тĕлне те пысăк парне пулчĕ.

Уяв тени юрă-ташăсăр пулмасть. Уява пухăннисене районти культура çурчĕн ĕçченĕсем ятарласа хатĕрленĕ хăйсен юрри-ташшисемпе са­вăнтарчĕç.

А.НИКОЛАЕВА.

Сăн ÿкерчĕкĕ Н.ШИШКИНАН.

Добавить комментарий

Наши соцсети

Яндекс. Новости

Архив материалов

Март 2024
Пн Вт Ср Чт Пт Сб Вс
26 27 28 29 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Праздники

Последние комментарии

Яндекс.Метрика