Çемье — çынна шăпа парнелекен чи хаклă пуянлăх. Хăйне çур сăмахранах ăнланакан, йывăр самантра алă пама пултаракан çывăх çын çумра пулни малалла утма хистет. Паллах, ачасемсĕр пурнăç тулли мар, калчасăр уй-хир евĕрех. Ача-пăча пÿрт тултараканĕ, пурнăç илемĕ. Пÿрте ăшăтаканĕ юратупа килĕшÿ. Килĕшÿпе юрату пулсан çемье çирĕп.
Кивĕ Вăрмарти Алена Вячеславовнăпа Иван Николаевич Борисовсен çемйинче юратупа ăшăлăхра виçĕ ача çитĕнет. Асли Ника 11 çулта, Артем 9 çулта, Аня 4 çулта. Никăпа Артем ялти шкулта тăрăшса вĕренеççĕ, Аня Вăрмарти «Родничок» ача сачĕн воспитанникĕ. Шкулта вĕренсе ача садне çÿренисĕр пуçне вĕсем пурте пысăк хавхаланупа кружоксене çÿреççĕ. Тĕрĕсрех каласан, ашшĕпе амăшĕ вĕсене кашни кунах, канмалли кунсемсĕр пуçне, Вăрмарти Спорт шкулне леçеççĕ. Ника волейбол секцине çÿрет, команда йышĕнче тĕрлĕ ăмăртусене хутшăнать. Артем футбол вăййине суйласа илнĕ, пĕчĕк Аньăна ача сачĕ хыççăн аэробика занятийĕсем кĕтеççĕ. Ашшĕпе амăшĕ ачисем спортпа туслă пулнăшăн савăнаççĕ.
Аленăпа Иван иккĕшĕ те пĕр ялта, пĕр шкулта çитĕннĕ. Пĕр-пĕринчен аякра пурăнман. Ĕне çитерме тухмассерен çывăхланса пынă. Çапла 8-мĕш класра чухнех туслашнă вĕсем. Шкултанпах пыракан юратуран 2010 çулта Борисовсен çемйи йĕркеленет. Мăшăрлансан, аслă ачи Ника 8 уйăхра пулнă чухне, Ивана салтака ăсатаççĕ. «Мăшăр салтакра пулнă вăхăтра пĕр кун та анне патĕнче çĕр каçман, йăлтах Ваньăн ашшĕпе амăшĕн килĕнче пурăннă ун чухне», - аса илет Алена Вячеславовна. Паянхи кун вĕсем икĕ хутлă илемлĕ пысăк çуртра пурăнаççĕ, хуçалăх тытса пыраççĕ, выльăх-чĕрлĕх усраççĕ. Иккĕшĕ те ял пурнăçне кăмăлланăран тăван Кивĕ Вăрмарта ялсен социаллă аталанăвĕпе çыхăннă «Ялти çамрăк специалист» патшалăх программипе усă курса вĕсем хăйсен çуртне тума шутланă. 2015 çулта чăвашсен ĕлĕкренех пыракан йăли-йĕркине пăхăнса çĕнĕ пÿрт ĕçки туса хăйсен йăвине пурăнма куçаççĕ. Çурт строительствипе çыхăннă чылай ĕçе хăйсен, тăванĕсен вăйĕпе пурнăçланă Борисовсем.
Алена Вячеславовна шкул хыççăн Юдинори чукун çулпа транспорт техникумĕнчен вĕренсе тухнă, анчах та чун туртнă профессипе ĕçлес тĕллевпе Чăваш культура институтĕнче пĕлÿ илсе библиотекарь ĕçне алла илме шутланă. Халĕ вăл Кивĕ Вăрмарти библиотека заведующийĕ, 2013 çултанпа тăрăшать çак должноçре. Кулленхи тивĕçе пурнăçланă май ял халăхĕпе, шкул ачисемпе тĕрлĕ мероприятисем ирттерет. Хăй те, çемйипе те ял, район, республика шайĕнчи тĕрлĕ мероприятисене хутшăнаççĕ.
Алена Вячеславовнăн мăшăрĕ Иван Николаевич Кивĕ Вăрмарти вăтам шкул хыççăн Чăваш патшалăх ял хуçалăх академийĕнчен агроном специальноçĕпе вĕренсе тухнă. Паянхи кун вăл груз турттармалли машинăпа çынсем патне тĕрлĕ строительство материалĕсем леçессипе ĕçлет.
Борисовсем туслă пурăнаççĕ, çемйипе тĕрлĕ конкурссене, ăмăртусене хутшăнаççĕ. 2021 çулта вĕсем республика шайĕнче «Çулталăк çемйи» конкурса хутшăннă. 2022 çулта Чăваш Республикин Пуçлăхĕн парнисене çĕнсе илессишĕн «Спорт çемйи» фестивале хутшăнса пултаруллă çемье республикăра 3-мĕш призлă вырăн йышăннă.
Ĕçлеме кăна мар, канма та пĕлеççĕ Борисовсем. Кăçал акă вĕсем çемйипе Кама шывĕ хĕрне, Абхазие /хальлĕхе ачисемсĕр\ канма кайнă. Çитес çул ачисене те илсе кайса кăтартасшăн-ха илемлĕ патшалăхпа паллашма.
Пĕр-пĕрне ăнланса, килĕштерсе пурăнаççĕ Алена Вячеславовнăпа Иван Николаевич, ачисене пурнăçа, спорта, çутçанталăка, çывăх çынсене юратма, çĕршыва юрăхлă çынсем пулма вĕрентеççĕ.
«Çемье – хавхалану çăлкуçĕ» проект ЧР Цифра аталанăвĕпе информаци политикин тата массăллă коммуникацисен министерствин гранчĕпе пурнăçланать.
Кăларăма проект авторĕ Эвелина Михайлова хатĕрленĕ.
