«Вĕрентÿ» федераци шайĕнчи наци проекчĕпе килĕшÿллĕн ĕçлекен регионти проектсем пирĕн районта пурте ăнăçлă аталанса пыраççĕ. Вăрмар районĕнчи виçĕ шкулта «Ÿсĕм вырăнĕ» /«Точка роста»/ вĕрентÿ центрĕсем ĕçлесе кайрĕç. Пĕлтĕр Г.Е.Егоров ячĕллĕ Вăрмарти, кăçалхи сентябрьтен пуçласа - Пысăк Енккассинчи тата Мăнçырмари вăтам шкулсенче. Наци проекчĕпе килĕшÿллĕн пурнăçланакан ĕçсемпе тĕплĕнрех паллашас тĕллевпе эпир çак кунсенче шăпах Пысăк Енккассинчи вăтам шкулта пулса куртăмăр. Ял ачисем чăннипех те информаци технологийĕсен аталанăвĕпе çыхăннă паянхи йышши условисенче пур енлĕн аталанса пĕлÿ илеççĕ, çавна май районта кăна мар, Раççей, республика шайĕнче иртекен конференцисемпе олимпиадăсене, тĕрлĕ мероприятисене хутшăнса лайăх кăтартусемпе палăраççĕ, малти вырăнсене йышăнаççĕ.

IMG 9969«Пирĕн шкулта паянхи куна кÿршĕ ялсенчи 186 ача вĕ­ренет. Пур ачана та паха пĕлÿпе тивĕçтермелли условисем йĕркеленĕ. «Вĕрентÿ» наци проекчĕпе килĕшÿллĕн «Паянхи шкул», «Кашни ачан çитĕнĕвĕ» проектсем пурнăçланаççĕ. Сентябрĕн 1-мĕшĕнчен пуçласа ятарлă «Ÿсĕм вырăнĕ» вĕрентÿ кабинетне хута ятăмăр. Кунта ытларах «Информатика», «ОБЖ», «Техно­логи» предмечĕсене та­рăнрах вĕрентмелли условисем аван, паллах, ытти предметсемпе те аталанма майсем пур. ЧР Вĕрентÿпе çамрăксен политикин министерстви пулăшнипе кабинета çĕнĕ сĕтел-пуканпа, шкапсемпе, тĕр­лĕ механика моделĕсем мĕнле ĕçленине тĕпчесе проект ĕçĕсем ирттермелли конструктор­семпе тата ытти япаласемпе тивĕçтертĕмĕр. Шахматла вылямалли вырăн йĕркелерĕмĕр», — каласа пачĕ чи малта­нах шкул директорĕ Луиза Ивановна.

IMG 9974Кашни шкулăн хăйĕн çăлтăрчăкĕсем пур. Хăйсен вĕ­ренÿри тăрăшулăхĕпе, вĕ­рен­текенсем чунпа парăнса ĕçленĕрен ачасем çитĕнÿ хыç­çăн çитĕнÿ тăваççĕ. Вĕсем хушшинче ЧР Пуçлăхĕн стипендиачĕ, шкул юлташĕсен канашĕн лидерĕ Надя Григорьева, тĕрлĕ шайри олимпиадăсемпе конференцисенче хут­шăнса малти вырăнсене ти­вĕçнĕ Дарья Сергеева, Иван Васильев, Нина Романова тата ыттисем те.

IMG 9981«Акă 8-мĕш кадет класĕнче вĕренекенсем Дарья Сергеева тата Иван Васильев çак кунсенче кăна пире шкул ачисен муниципалитет шайĕнчи олимпиадисенче палăрнипе са­вăнтарчĕç. Дарья историпе çĕн­терÿçĕ пулса тăчĕ /вĕрентекенĕ А.М.Милаев/, Иван математикăпа призера тухрĕ /вĕ­рентекенĕ Т.В.Русакова/. Вырăс чĕлхипе иртнĕ олимпиа­дăра вĕсем иккĕшĕ те призер­сем пулса тăчĕç. Вĕрентеке­нĕ вĕсен А.Ю.Афанасьева. Иван ОБЖ предмечĕпе çĕнтернĕ, биологи, экологи предмечĕсемпе призер, Дарья экономикăпа, обществознанипе призер. Çа­вăн пекех 11 класра вĕренекен Артем Васильев ра­йонта нумай пулмасть акăлчан чĕлхипе иртнĕ олимпиадăра çĕн­терчĕ, 10 класри Карина Гурь­ева призера тухрĕ. Руководителĕ Т.В.Вишневс­кая. 7 класри Никон Мартынов инфор­матикăпа, экологипе призер. 8 класри Севастьян Василь­ев ОБЖ, физкультура предмечĕсемпе çĕнтерÿçĕ. Акă декабрь уйăхĕнчех пултаруллă ачасемпе çамрăксен «Эткер» центрта экологи предмечĕпе республикăри 27-мĕш нау­кăпа практика конференци­йĕ иртнĕ. 8 класра вĕренекен Дарья Сергеева хăйĕн тĕпчев ĕçĕпе республика шайĕнче 3-мĕш вырăна тухрĕ, пĕлтĕр çĕнтерÿçĕ пулнăччĕ. Руко­водителĕ Т.Р.Табакова. «Ÿсĕм вырăнĕ» центра хута яни ача­семшĕн çав тери кăсăклă, пире, вĕрентекенсене, каш­ни ачан хăйнеевĕрлĕхне, хăш енĕ­пе аталан­ма пултарассине палăртма май парать», - каласа пачĕ пире шкул директорĕн заместителĕ Людмила Яковлевна Дзюба.

IMG 0002«Ÿсĕм вырăнĕ» вĕ­рентÿ центрĕнче «Информатика», «Информаци технологийĕсем» предметсене Аврора Пет­ровна Григорьева ачасемшĕн çав тери кăсăклă ертсе пырать. 3D принтер, виртуаллă чăнлăх шлемĕ, квадрокоптерсем, смартфонсем, фотоаппарат, информаци астăвакан картăсем, микрофон, ноутбуксем — занятисене кăсăклă ирттермелли çĕнĕ йышши хатĕрсем. 3D принтер мĕнне куçпа курмасăр ахаль сăмахпа ăнлантарма та çăмăл мар. Ахаль принтерсем хут кăлараççĕ пулсан, 3D принтерпа пластмасран тĕрлĕ япаласем кăларма пулать. Ку вăл ачасен фантазийĕнчен те килет. Чăн малтанах компьютер çинче ятарлă программăпа пулас япалан модельне хатĕрлеççĕ, унтан принтер хăйĕн ĕçне пуçлать. Тĕрлĕ тĕслĕ пластмасс катушкăсенчен кăмакаран пиçсе тухнă пек 3D принтертан смайлик тухнине хам куçпа курса тĕлĕнтĕм. Çапла шкул ачисем брелоксем, медальсем туса хатĕрлеме вĕ­ренсе çитнĕ. Пĕр япала 40 минута яхăн «пиçет». Биологи вĕрентекенĕ Татьяна Рудольфовна Табакова ачасемпе пĕрле 3D принтерпа усă курса коронавируспа тата унпа кĕрешекен антителăсен модельне те туса хатĕрленĕ. Çапла ачасем ку мĕнле чир иккенне лайăхрах ăнланаççĕ паллах. Шкула республика шайĕнчи хăна килсен те çухалса кайман ачасем: квадрокоптерпа хăйсем тунă сывлăх сунакан смайлик вĕçтерсе кĕтсе илнĕ. 11 класра вĕренекен Артем Васильевпа Надежда Григорьева иккĕшĕ уроксем хыççăн юлса кăçал 3D принтерпа усă курса шахмат хăмипе шах­мат кĕлеткисене те хăйсемех туса хатĕрленĕ. Кăçалтан Пысăк Енккассинчи шкулта 10 класра вĕренме пуçланă каччăсем — Владимир Крылов /Çÿлти Кинчер\ тата Александр Васильев /Атнаш\ кунта вĕренме çав тери интереслине палăртаççĕ.

IMG 0013Çавăн пекех шкулта онлайн мелĕпе «Эткер» центр урлă «Мультимедийная журналистика» занятисем иртрĕç /руководителĕ А.Григорьева\. 10 класра вĕренекен Нина Романовăпа 8 класри Дарья Сергеева республика шайĕнче онлайн мелĕпе журналистика вăрттăнлăхĕсене алла илчĕç, заданисем пурнăçларĕç. Ачасем оборудованипе усă курса хăйсемпех видео, фото ÿкерме, çырса хак пама та пултараççĕ.

Технологи, пурнăç хăрушсăрлăхĕн никĕсĕсен е, урăхла каласан, ОБЖ предмечĕсене Вячеслав Николаевич Иванов ертсе пырать. «Вĕрентÿ» наци проекчĕн «Паянхи шкул» регионти проекчĕпе килĕшÿллĕн медицина пулăшăвĕ кÿмелли 2 аптечкăпа, пирвайхи пулăшу кÿме вĕрентессипе манекенсем, ятар­лă кĕнекесемпе тата ыттипе те тивĕçтернĕ. «Ачасене ОБЖ урокĕсенче чăн малтанах мĕн хыççăн мĕн тумаллине ăнлантаратпăр. Тĕс­лĕхрен, манекенпа усă курса пыра ларнă шăмма кăларма вĕрентетпĕр. Тĕрĕс мар тусан манекенри шăмă тухмасть, тĕрĕс тусан — тухать. Паллах пирĕн шкулта «Ÿсĕм вырăнĕ» вĕрентÿ центрĕ уçăлни пур енлĕн те питĕ пĕлтерĕшлĕ тесе шутлатпăр», - палăртрĕ хăйĕн шухăшне Вячеслав Николаевич.

Э.МИХАЙЛОВА.

Добавить комментарий

Наши соцсети

Яндекс. Новости

Архив материалов

Февраль 2021
Пн Вт Ср Чт Пт Сб Вс
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28

Праздники

Последние комментарии

Яндекс.Метрика