73Пандеми пĕтĕм пурнăçа пуçхĕрлĕ çавăрса хучĕ пулин те аталану пирки манман – социаллă ыйтусемпе те, экономикăна вăй парас тĕлĕшпе те çине тăрса ĕçленĕ. Çапларах палăртмалла ЧР Пуçлăхĕ Олег Николаев декабрĕн 24-мĕшĕнче ирттернĕ, çулталăка пĕтĕмлетессине халалланă пресс-конференцири калаçăвăн тĕп шăнăрне.

Пандемие парăнмастпăр

Икĕ сехет те 20 минута яхăн тă­сăлнă калаçăва пуçланă май Олег Николаев вĕçленекен ансат мар çулталăк тĕр­лĕ пулăмпа асра юлассине палăртрĕ. Чи малтанах, паллах, суйлав. Тата – коронавирус инфекцийĕ. Ун­па кĕрешме уйăр­нă укçа ви­çи кăна – 7 млрд тенкĕ патнелле. Çак ук­çапа кашни çын медицина пулăшăвĕ илме пултартăр, çав вăхăтрах экономика та анса ан лартăр тесе усă кур­нă – респуб­лика бюджетне çак тĕллевсене тĕпе хурса шай­лаштарма май килнĕ.

Кĕркунне лару-тăрăва çи­­вĕч­летрĕ: 3295 койка-вырăн, чирпе медучрежденисен 17 пин ĕçченĕ кĕрешет. Лару-тăру йывăррине вара çа­кă та çирĕп­летет: ытти чухне çынсем васкавлă медпулăшу чĕнсе талăксерен вăтамран 90-100 хут шăнкăравланă, пандеми тапхăрĕнче вара – 600 шăнкăрав таран. Сыв­лăх сыхлавĕн тытăмĕ çине мĕнешкел тиев лекни каламасăрах паллă. Халь сахалрах – 200-250 шăнкăрав патнелле.

Укçа çитет

Республикăн социаллă пурнăçпа экономика аталанă­вĕн уйрăм программи тĕрев кÿни куçкĕрет: ăна республика çĕршыври аталану енĕпе юлса пыракан регион пулнине кура йышăннă, пулăшмашкăн Мускав çуллен пĕрер миллиард тенкĕ уйăрать. Йывăр пулин те социаллă ыйтусене татса парас тĕлĕшпе курăмлă йышăнусем тума пултарнă. Журналистсем «укçа çитĕ-и?» тесе ыйтнине Чăваш Ен Пуçлăхĕ иккĕленмесĕр хуравларĕ: çитеретпĕр, анчах йывăрлăхсем тухса ан тăччăр тесен экономика çине алă сулма юрамасть.

Тарифсене ÿстермесĕр май çук

Тарифсем тенĕрен, вĕсем, паллах, ÿсĕç – çитес çулхи июль уйăхĕнчен саккунпа килĕшÿллĕн 3% ытларах: «Унсăрăн май çук. Бюджет виçесĕр мар, мĕншĕн тесен тарифсем тăкаксем çинче никĕсленеççĕ. Вĕсене кам «шăнтса лартать» - çавăн тÿлеме тивĕ. Çав вăхăтрах ăнланмалла тарифсем пулччăр тесе çине тăрса ĕçлетпĕр».

Ял пĕтмест

Ялсенче пурăнакансен йы­шĕ чакса пынине Олег Алексеевич ăнланать, куншăн чунĕ ыратать. Ун шу­чĕпе, йыш чакни чи малтан ял хуçалăхĕнче ĕçлемешкĕн унчченхи пек нумай çын кирлĕ пулманнипе те сăлтавланнă. Анчах ку ял çине алă сулмаллине пĕлтермест. Унти пурнăç условийĕсене ла­йăхлатмалла. Çа­­вăнпа респуб­лика ял ипотекине субсидилет, территорисене аталантармалли проектсене пурнăçлать, мерăсем йышăнать. Тепĕр енчен, çынсем ялсенчен хуласене ĕçлеме çÿрени­не те сивлеймĕн. Çÿреччĕр, анчах урăх çĕрте ĕçлеççĕ пулин те вĕсем ялта пурăнаççĕ - ку ял аталанă­вĕн никĕсĕ пулĕ.

Чăвашла калаçар!

Олег Николаев шучĕпе тă­ван чĕлхене эпир йĕркеллех упраса хăварнă, сăмах ăна ата­лантарасси тавра пулмалла терĕ. Телекурав, хаçат-журнал пур, чăвашла тухакан кĕ­не­кесен шучĕ ÿснĕ, чĕлхене аталантармалли çумпрограммăна та йышăннă. Кăçал Конституцие халăхсене хăйсен чĕл­­хине, культурине аталантар­ма май паракан тÿрлетÿ кĕртни те ку енĕпе пулăшма тивĕç. Чĕлхепе усă курни ăна аталантарма уйăракан укçаран та хак­лăрах. Олег Алексеевич хăй меллĕ кашни самантрах чăвашла калаçма тăрăшать.

«Хыпар» хаçатран.

Добавить комментарий

Наши соцсети

Яндекс. Новости

Архив материалов

Июнь 2021
Пн Вт Ср Чт Пт Сб Вс
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 1 2 3 4

Праздники

Последние комментарии

Яндекс.Метрика