896B0993

Вăхăт пĕр сисĕнмесĕрех иртет. Акă шкулпа сывпуллашмалли вăхăт та çитрĕ. Ăсату каçĕ пĕр вăхăтрах савăнăçлă та кăштах тунсăхлă уяв. Ĕнер кăна шкул ачи пулнă çамрăксен пĕр класра пĕлÿ пухнă юлташĕсемпе, тăван пекех çывăхланса çитнĕ вĕрентекенсемпе уйрăлмалла...

Июнĕн 25-мĕшĕнче пирĕн ра­йонти вăтам пĕлÿ паракан пур шкулсенче те ăсату каçĕсем ирт­рĕç. Пысăк Енккассинчи пĕтĕмĕш­ле пĕлÿ паракан вăтам шкулта та çак ятпа мероприяти пулчĕ. Шкултан вĕренсе тухакансене уяв ячĕпе Вăрмар район пуçлăхĕ М.Пуклаков, район администрацийĕн пуçлăхĕн заместителĕ — ял хуçалăхĕпе экологи пайĕн начальникĕ Н.Николаев, райадминистрацин вĕрентÿпе çамрăксен политикин управлени­йĕн начальникĕн заместителĕ С.Уливанова, Пысăк Енккасси ял тăрăхĕн пуçлăхĕ Л.Александрова саламларĕç. Шкул директорĕ Г.Архипова выпускниксене пурнăçăн анлă çулĕ çине тухма, палăртнă тĕллевсене пурнăçлама ăнăçу, çирĕп сыв­лăх сунчĕ. Кăçал Пысăк Енккассинчи вăтам шкултан, 11-мĕш клас­ран, 17-ĕн вĕренсе тухрăмăр. Кÿршĕллĕ ялсенчен — Пысăк Енккасси, Ка­рăк­çыр­ми, Саруй, Уйкас, Пинер, Вăтакас, Çÿлти тата Çĕнĕ Кинчер ялĕсенчен пĕр шкула, пĕр класа пуçтарăнса Галина Васильевна Алексеева класс руководителĕ ерт­се пынипе туслă пулса, тăрăшса вĕрентĕмĕр.

Чи асра юлмалли тата пăлханмалли самант вăл пирĕншĕн – шкултан вĕренсе тухакансемшĕн атте-аннесем, вĕрентекенсем умĕн­че вăтам пĕлÿ илни çинчен калакан аттестата алла илесси пулчĕ. 17 шкул ачирен пĕрин хыççăн теп­ри кашниех аттестат илме хумханса сцена çине хăпартăмăр. Пирĕн хушăра шкула «Вĕренÿри уйрăмах пысăк çитĕнÿсемшĕн» медальпе вĕ­ренсе тухакан та пулчĕ. Ку вăл Çÿлти Кинчер ялĕнчи Дмитрий Сергеев пулчĕ. Пур енчен те пултаруллă каччă. Унсăр пуçне тата тепĕр 4 çамрăк алла аттестат «с отличием» илчĕ. 11-шĕ «4» тата «5» паллăллă аттестатсемпе шкул пĕтерчĕ. Чи нумай балл пухаканĕ Вăтакас­ри Вера Зарева пулчĕ. Вырăс чĕлхипе иртнĕ Пĕрлехи патшалăх экзаменĕнче вăл 94 балл пухма пултарнă. Маттур! Ытти ачасем те лайăх результатсемпе палăрчĕç.

Выпускниксем, эпир, уява хутшăннă атте-аннесене, педагогсене, хăнасене музыка номерĕсемпе савăнтартăмăр. Класпа тул çутăлнине те кĕтсе илтĕмĕр. Ăсату каçĕ чылайлăха пирĕн асра юлĕ, шкулти туслăха аса илтерĕ. Сывă пулăр, юратнă шкул, юратнă вĕрентекенсем! Тавтапуç сире! Халĕ эпир пурнăçăн аслă çулĕ çине тухатпăр. Умра пире çĕнĕ тĕллевсемпе çĕнĕ çитĕнÿсем кĕтессе шанатпăр!

Е.РИМАНОВА.

Çĕнĕ Кинчер ялĕ.

Добавить комментарий

Наши соцсети

Яндекс. Новости

Архив материалов

Сентябрь 2019
Пн Вт Ср Чт Пт Сб Вс
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6

Праздники

Последние комментарии