Г.Е. Егоров ячĕллĕ Вăрмарти пĕтĕмĕшле пĕлÿ паракан вăтам шкулта ятарлă çар операцийĕнчи салтаксене валли гуманитари пулăшăвĕ пуçтарассипе акци иртрĕ. Унта вĕренекенсемпе педагогсем кăна мар, ашшĕ-амăшĕсем те хутшăнчĕç — ырă чĕресем пĕрлехи ĕçшĕн пĕр чăмăра пухăнчĕç.
Вăрмар шкулĕнчен вĕренсе тухса халĕ ятарлă çар операцийĕн зонинче çар тивĕçĕсене пурнăçлакан салтаксемпе уйрăмах мăнаçланатпăр тата вĕсемшĕн хумханатпăр. Акă, тĕслĕхрен, Д.А. Кораблев СВОра харсăрлăхпа палăрать, вăл тÿпе артиллерийĕн дивизионĕн 165-мĕш бригадин аслă лейтенанчĕ. Пирĕншĕн вăл — паттăрлăхпа хăюлăх тĕслĕхĕ. Педагогсен коллективĕ тата вĕренекенсем унăн ăнăçăвĕсене куçран вĕçертмеççĕ, ăна çирĕп сывлăх тата службăна çÿллĕ шайра тытма сунаççĕ.
Акци вăхăтĕнче ĕçмелли шыв, тасалăхпа сывлăха упрамалли хатĕрсем, эмелсем пуçтарнă. Шкул администрацийĕ гуманитари пулăшăвĕ пуçтарма хутшăннă кашни çемьене тав тăвать.
Светлана ЕЛИСЕЕВА, шкул библиотекарĕ
