Вăрмар районĕнче ĕçлĕ визитпа ЧР Патшалăх Канашĕн депутачĕ Ю.Зорин тата Чăваш Енри предпринимательсен прависене хÿтĕлессипе ĕçлекен уполномоченнăй А.Рыбаков пулчĕç.

Райадминистраци пуçлă­хĕн ĕçĕсене пурнăçлакан Н.Павлов, ЧР Патшалăх Канашĕн депутачĕн Ю.Зоринăн Вăрмар районĕнчи пулăшуçи Ю.Иванов ертсе пынипе вĕсем ра­йонти чи пысăк хуçалăхсенчен пĕр­не — «Иванов В.А.» хресчен-фермер хуçалăхне çитсе курчĕç. Кунти ĕçе еплерех йĕркеленипе унăн руководителĕ Владимир Анатольевич Иванов паллаштарчĕ. Паянхи куна фермăра мăйракаллă шултра выльăх йышĕ 478 пуç, вĕсенчен 224-шĕ сăвакан ĕнесем. Пĕтĕмпе 6 уйăх­ра 43,5 тонна аш-какай туса, 707 тонна сĕт суса илнĕ. Хуçалăхра 3,5 пин гектар çĕр çинче тĕрлĕрен культурăсем çитĕнтереççĕ.

Тĕлпулу вăхăтĕнче А.Рыбаков Владимир Анатольевича патшалăх пулăшăвĕпе усă курмалли мелсемпе паллаштарчĕ, малалла аталанмалли канашсем пачĕ, Шупашкарти «Агро-Инновации» хысна унитари предприяти­йĕпе тачă çыхăнса ĕçлемеллине каларĕ.

Ĕçлĕ ушкăн малалла Светлана Николаевна Белоусова ертсе пыракан «Светлана» тулли мар яваплă обществăна çул тытрĕ. Çĕвĕ предприятийĕнче паянхи кун 72 çынна ĕç вырăнĕсемпе тивĕçтернĕ. Апла пулин те производствăна малал­ла аталантарма кадрсем çитмеç­çĕ. Предпринимательсен прависене хÿтĕлессипе ĕçлекен уполономоченнăй Александр Николаевич ЧР Вĕрентÿпе çамрăксен политикин министерствине çĕвĕçсем хатĕр­лесе кăларакан курссем йĕркелемелли çинчен ыйтса çырупа тухма хушрĕ. ЧР Патшалăх Канашĕн депутачĕ Ю.Зорин ку енĕпе пулăшма шантарчĕ.

«Светлана» çĕвĕ предприяти­йĕн ĕçĕ хĕллехи тата çуллахи ĕç тумĕсем, вырăн таврашĕсем, курткăсем, халатсем çĕлесси çинче ни­кĕсленнĕ. Вăрмар районĕнчи предприятисенче ĕçлекенсем шăпах «Светлана» тумне тăхăнаççĕ. Раççей рынокĕнчи пысăк компанисене те ĕç тумĕсемпе тивĕçтерет вăл. Вĕсен шутĕнче - «Восток-Сервис», «Авангард», «Урсус», «Экспертспецодежда» тулли мар явап­лă обществăсем. Çĕвĕ предприяти­йĕн продукцийĕ Чăваш, Удмурт, Тутарстан Республикисем, Мускав ху­липе облаçĕ тăрăх саланать. Пу­рăнмалли çурт-йĕрпе коммуналлă тата ял хуçалăх, строительствăпа промышленноç предприятийĕсенче вăй хуракансем нумайăшĕ «Светлана» тулли мар яваплă общество çĕлесе хатĕрлекен тумтире килĕш­терсе тăхăнаççĕ.

Çав кунах Чăваш Енри предпринимательсен прависене хÿтĕлессипе ĕçлекен уполномоченнăй А.Рыбаков райадминистрацин ларусен залĕнче районти предпринимательсемпе ĕçлĕ тĕлпулу ирттерчĕ. Александр Николаевич хăйĕн сăмахĕнче коронавирус алхаснă тапхăрта предпринимательсем тивĕçекен патшалăх пулăшăвĕн мерисем çинче тĕплĕн чарăнса тăчĕ. «Предпринимательсем 2 %-лă çăмăллăхлă кредит илме пултараççĕ. Çак укçапа ĕçлекенсене ĕç укçи тÿлеме, бизнесри расхутсене саплаштарма, унч­ченхи кредитсене хупма пулать. Асăннă çăмăллăхлă кредита мĕнле хупасси ĕçлекенсен шутĕнчен килет. Тĕплĕнрех 8-8352-30-28-30 телефонпа шăнкăравласа пĕлме пулать», — терĕ Александр Николаевич.

Çавăн пекех вăл коронавирус сарăласран асăрханмалли пирки тепĕр хутчен аса илтерчĕ. Ĕçлекенсен ÿт температурине кунсерен виçсе ятарлă журналта çырмаллине, алла дезинфекцилемеллине, пĕр-пĕрин хушшинче дистанци тытмаллине, унсăр пуçне ĕçлекенсем ют регионсене, ытти çĕре тухса çÿренине тимлесе тăмаллине каларĕ. Александр Николаевич ытти темăсене те хускатрĕ, предпринимательсемпе çыхăну тытма, май килнĕ таран пулăшма яланах хатĕр­рине палăртрĕ, пухăннисен ыйтăвĕ­сем çине те хуравларĕ.

Э.МИХАЙЛОВА, И.ДАНИЛОВА.

Добавить комментарий

Наши соцсети

Яндекс. Новости

Архив материалов

Август 2020
Пн Вт Ср Чт Пт Сб Вс
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

Праздники

Последние комментарии

Яндекс.Метрика