Июлĕн 4-мĕшĕнче "Хĕрлĕ ялав" хаçат редакцийĕнче лотерея вылявĕ иртрĕ.
Район хыпарçине иккĕмĕш çур çулшăн çырăнса илекенсем редакцине квитанцисем пыра-пыра пачĕç. Тĕрлĕ-тĕрлĕ парне выляса илекенсем хушшинче паллаканнисене тÿрех пĕлтерме май тупрăмăр. Пĕрин хыççăн тепри вĕсем редакцине килсе парнисене иле-иле кайрĕç. Паллах, тĕп парнене çĕнсе илекенни вĕсем хушшинче чи телейли пулчĕ. Кăçалхи июль уйăхĕнчи лотерея вылявĕ Вăрмар поселокĕнче пурăнакан Лилия Алефсоновнăпа Николай Владимирович Спиридоновсен çемйишĕн чылайлăха асра юлчĕ. Шăпах вĕсем тивĕçрĕç чи пысăк парнене. Лилия Алефсоновна Спиридонова район хаçатне чылай çул пĕр сиктермесĕр çырăнса илет. Ку хутĕнче те вăл Вăрмарти почта уйрăмне кайса "Хĕрлĕ ялава" çырăнма ÿркенмерĕ. Лотеря вылявĕнче унăн квитанцийĕ çĕнтерÿллĕ пуласса шанма та пултарайман иккен вăл. Тикаш ялĕнчи хресчен-фермер хуçалăхĕн пуçлăхĕ Сергей Геннадьевич Грачев хаçат редакцине пысăк пулăшу кÿчĕ, вăл тĕп парне спонсорĕ пулса тăчĕ. Лилия Алефсоновна хăй ирĕкĕпе така вырăнне усрамашкăн Романовски ăратĕнчи сурăх суйласа илчĕ. Сергей Геннадьевич лотерея вылявĕн çĕнтерÿçине ырă кăмăлпа, ырă сунса сурăх парнелерĕ. Лилия Алефсоновна та хăй енчен хăйĕн савăнăçне пытараймарĕ, чунтанах хĕпĕртерĕ, Сергей Геннадьевича, "Хĕрлĕ ялав" хаçат редакцине тав турĕ.
Лилия Алефсоновна район хыпарçине вулама юратать. Тăвансене хаçат урлă саламлама та килĕшет ăна. 20 çул ытла вăл Вăрмарти Г.Е.Егоров ячĕллĕ пĕтĕмĕшле пĕлÿ паракан вăтам шкулта тирпей-илем кĕртекенре вăй хурать. Унăн мăшăрĕ Николай Владимирович чукун çул çинче монтер пулса ĕçлет. Мăшăрĕпе иккĕшĕн ывăлпа хĕр. Ывăлĕ Николай 24 çулта, кĕçĕнни Вероника 5 çулта кăна-ха. Лилия Алефсоновна малашне те "Хĕрлĕ ялав" хаçата çырăнсах тăма шантарчĕ.
Э.Михайлова.
