В.Александров, Вăрмар район администрацийĕн пуçлăхĕн пĕрремĕш заместителĕ: «Республикăри халăхăн пĕр пайне мобилизациленине кура вĕсен çемйисемпе ачисене пулăшас тĕллевпе тĕрлĕ мерăсем йышăннă. ЧР Пуçлăхĕ Олег Николаев тÿрĕ эфира тухса республикăра пурăнакансене çак мерăсемпе тĕплĕнрех паллаштарчĕ, çынсен ыйтăвĕсем çине хуравларĕ. Ыйтусем тĕрлĕрен пулчĕç, çапах та çынсене ытларах укçа-тенкĕ ыйтăвĕ пăшăрхантарни палăрчĕ. Çакна ăнланма пулать паллах. Çемье пуçлăхĕсем çĕршыв тăнăçлăхне упрама тухса кайнă тапхăрта вĕсен мăшăрĕсене, ачисене, ашшĕ-амăшне пĕрре те çăмăл мар, вĕсене тĕрлĕ енлĕ пулăшу кирлĕ. Çавăнпа патшалăх мобилизациленĕ граждансен çемйисене пулăшу кÿрессине пысăк тимлĕх уйăрать. Олег Николаев республикăра координаци центрĕсем ĕçленине, кунта çынсен кирек мĕнле ыйтăвне те кĕске вăхăтра тата туллин татса парассишĕн тăрăшнине пĕлтерчĕ. Районсенче халăхăн социаллă ыйтăвĕсене тивĕçтерекен центрсем çумĕнче мобилизациленĕ граждансен çемйисене пулăшу кÿрессипе тĕллевлĕн ĕçлеççĕ.
Пирĕн районта та мобилизациленĕ граждансен çемйисем федераци шайĕнчи, çавăн пекех ЧР Пуçлăхĕн Хушăвĕпе килĕшÿллĕн çирĕплетнĕ çăмăллăхсемпе усă кураççĕ. Шкул ÿсĕмĕнчи ачасем кунне икĕ хутчен тÿлевсĕр апатланаççĕ, çавăн пекех вĕсене ЧР Пуçлăхĕн 2 пин тенкĕпе танлашакан стипендине пама документсем хатĕрленĕ. Ача садне çÿрекен ачасем валли те çăмăллăхсем пур, вĕсене ашшĕ-амăшĕн тÿлевĕнчен хăтарнă. Районти халăхăн социаллă ыйтăвĕсене тивĕçтерекен комплекслă центр çумĕнче ĕçлекен психологипе консультаци пунктĕнче мобилизациленĕ граждансен çемйисене кирлĕ пек пулăшу пама хатĕр».
