● Мартăн 27-мĕшĕнче Энĕшпуçĕнчи шкул директорĕн ĕçĕсене вăхăтлăха Т.Н.Салахова пурнăçлама тытăнчĕ. Декабрĕн 3-мĕшĕнче Татьяна Николаевнăна ялти вăтам шкул директорĕ пулма уйăрса лартрĕç.
● Энĕшпуçсем СВО-ри салтаксем валли гуманитари пулăшăвĕ пуçтараççĕ, окоп çуртисем хатĕрлеççĕ, уроксенчен пушă вăхăтра шкулăн 2-мĕш хутĕнчи Çар Мухтавĕн музейĕн залĕнче учительсемпе вĕренекенсем тата ял халăхĕ икĕ сменăпа хастарлăх кăтартса маскировка сеткисем çыхаççĕ.
● Маларах ялти культура çуртĕнче çыхнă 14 массеткăна тата шкулти 18 массеткăна çапăçу хирне ăсатнă. Шкул ĕçченĕсем П.В.Егоров, В.П.Васильев, Н.Г.Сытин тăрăшнипе СВО-на 350 окоп çурти ăсатнă, тепĕр 200 шт. хатĕрлесе хунă.
● Пархатарлă ĕç тăвать Энĕшпуç ялĕнчи тÿрĕ кăмăллă патриот Валерий Алексеев, кашни паттăра пирĕн пулăшу çав тери кирлине ăнланса май килнĕ таран пулăшма тăрăшать. Акă вăл гуманитари пулăшăвĕпе СВО-на салтак-ентешсем валли апат-çимĕç, ăшă тумтир тата ытти те пуçтарса Аслă Чакри Сергей Борисовпа декабрĕн 23-мĕшĕнче тухса кайрĕ. Ял ачисем службăра тăракан вырăна 4-мĕш хут кайса килчĕ.
● Ятарлă çар операцине пирĕн ялтан хутшăнакансем 22 шутланаççĕ.
● Декабрĕн 8-мĕшĕнче пĕвери пăра шăтарса Леонид Егоров пулăç 8,3 килограмм таякан карп пулă тытса килчĕ, сезона ăнăçлă пуçларĕ.
● Вăрмар муниципаллă округĕн пуçлăхĕ Василий Шигильдеев тата Вăрмар муниципаллă округĕн мобилизаци хатĕрлевĕн, граждан оборонипе чрезвычайлă лару-тăру пайĕн начальникĕ Юрий Ефимов декабрьте Энĕшпуçĕнчи территори пайĕн пушар хуралĕн сотрудникĕсене çĕнĕ мотопомпа панă тата çĕнĕ каскăсемпе тивĕçтернĕ.
● Энĕшпуçĕнчи культура çуртĕнче ĕçлекенсем Хĕл Мучисемпе Юр Пикисен муниципаллă конкурсĕнче «Самые артистичные Дед Мороз и Снегурочка» номинацинче «Лучший Дед Мороз и Снегурочка-2024» çĕнтерÿçи пулса Вăрмар муниципаллă округĕн администрацийĕн Дипломне илме тивĕç пулнă. Конкурса О.Яковлева, Л.Иванова, Т.Михайлова, Г.Семенова хутшăнчĕç.
● Раççейри вулавçăсен «Женская лирика Серебряного века» конкурсĕнче 8-мĕш класри Александра Иванова, 7-мĕш класри Мария Иванова çĕнтерÿçĕсем пулса тăнă /руководителĕ Иванов И.М.\.
● Раççейри «Надежда машиностроения Чувашии» олимпиадăра 10-мĕш класри Владимир Николаев çĕнтерÿçĕне тухнă /руководителĕ Николаева И.А.\.
● Раççейри «Урок родного языка с любимым педагогом» сочиненисен конкурсĕнче 8-мĕш класри Виктория Алексеева призер пулнă /руководителĕ Дмитриева З.М.\.
● Кăçал та В.Николаевсен çемйи хушма хуçалăхра хăй ăсталанă инкубаторпа усă курса 100 хур, 80 индоутка, 1500 бройлер чĕппи кăларса ялти халăха тивĕçтернĕ, хуçалăхран тупăш илнĕ. Малалла кайăк-кĕшĕк йышне ÿстерме палăртнă, çавăнпа çулла вăхăта шеллемесĕр çине тăрса пысăк вите туса лартнă.
● Энĕшпуçĕнче 39-мĕш пушарпа çăлав чаçĕн уйрăм посчĕ ĕçлет. Кунта пурĕ 8 çын вăй хурать, вĕсем черетленсе дежурствăра тăраççĕ. Пушар деповĕнче 2 пушар машини яланах хатĕр тăрать.
● Энĕшпуçĕнчи килти хуçалăхра /ялпа станци\ КРС — 82, вĕсенчен 56 ĕне, сурăхсем – 32, качакасем – 18, сыснасем – 10, кайăксем – 1151, хурт-хăмăр йышĕ – 191 çемье, кролик – 52 шутланса тăрать.
● Ялта пурăнакан чи ватă хĕрарăмсем: Н.Семенова /1927 ç./ – 97-ре, Л.Васильева /1929 ç./ – 95-ре, Н.Алексеева /1930 ç./ – 94-ра, Р.Тимофеева /1930 ç./ – 94-ра, Н.Григорьева /1932 ç./ – 92-ре, Г.Николаева /1931 ç./ – 93-ре, Е.Ерошина /1933 ç./ – 91-ре, Е.Иванова /1933 ç./ – 91-ре, З.Алексеева /1934 ç./ – 90-ра, С.Григорьева /1934 ç./ – 90-ра, Т.Ерошина /1934 ç./ – 90-ра.
● Чи ватă арçынсем: В.Филиппов /1939 ç./ – 85-ре, Н.Руссков /1940 ç./ – 84-ра, П.Васильев /1941 ç.\/ – 83-ре, В.Порфирьев /1941 ç./ – 83-ре, С.Ильин /1942 ç./ - 82-ре.
● Пĕтĕмпе 3 ача çуралнă, 17 çын вилнĕ.
● Энĕшпуç тăрăхĕнче 1273 çын пурăнать, ялта 838, станцинче 272 çын, Атайкассинче – 52, Хуруйĕнче – 111 çын, ялти шкулта 112 ача вĕренет, 21 педагог ĕçлет.
Иван КРИКОВ
