Çурхи ака-суха ĕçĕсем çывхарса та çитрĕç. Хуçалăхсенче çурхи ака шăв-шавĕ кĕрлесе тăрать: техника хатĕрлеççĕ, вăрлăх, минераллă удобренисем туянаççĕ. Райадминистрацин ял хуçалăхĕпе экологи пайĕн начальникĕ Н.Николаев, райадминистрацин ертсе пыракан специалист-эксперчĕ – экологĕ А.Чернова, район хаçачĕн редакторĕ Э.Михайлова районти хуçалăхсенчи лару-тăрупа паллашма рейда тухрăмăр. Районти хăш-пĕр хуçалăхсенче акана та тухнă. Çавăн пекех нумай çул ÿсекен курăксене минераллă удобренисемпе те апатлантараççĕ. Уйсене пăхса çаврăннă май Кивĕ Вăрмарти «Урмарская» ăратлă кайăк-кĕшĕк фабрикин çĕрĕсем куç тĕлне пулчĕç. Вăрмар поселокĕнчен Кивĕ Вăрмар еннелле каякан çул хĕррипе вырнаçнă посадка хыçĕнче 200 яхăн гектар çĕр çинче хыт-хура ярса илнĕ. Иртнĕ çул çак çĕрсем çине ял хуçалăх техники пырса кĕменни яр уççăн курăнать. Ял хуçалăх пĕлтерĕшлĕ çĕрсем усăсăр выртни чуна пырса тивет. Тип-типĕ хыт-хурана çиллĕ çанталăкра çулăм хыпса илсессĕн туххăмрах пысăк лаптăксене вут-çулăм ярса илес хăрушлăх пысăк. Кăçал çак çĕр çинче мĕнлерех ĕçсем туса ирттерессипе кăсăкланса эпир «Урмарская» ăратлă кайăк-кĕшĕк фабрикин генеральнăй директорĕпе Александр Иванович Захаровпа курса калаçрăмăр. Вăл пире çапла хуравларĕ:
«Эпĕ кайăк-кĕшĕк фабрикине 2020 çулхи февраль уйăхĕнчен пуçласа ертсе пыратăп. Иртнĕ çул Раççейре, çавăн пекех пирĕн районта та коронавирус чирĕ анлă сарăлнине кура пирĕн патра ĕçлекен 65 çул тултарнă механизаторсене /ытларах кунта аслă ăру çыннисем ĕçлеççĕ\ вăхăтлăха карантина яма лекрĕ. Çавна май уй-хирсенчи ĕçсене агротехникăлла требованисемпе килĕшÿллĕн вăхăтра пурнăçласа ĕлкĕреймерĕмĕр. Çав шутра çак участокри 50 гектар çĕре кăна сухаласа хăвартăмăр. Çывăх вăхăтра пирĕн механизаторсем çак участока сÿрелеме тухма палăртаççĕ. Кăçал эпир çак лаптăка сухаласа хăварма, акма та палăртатпăр. Тĕш-тырă, сĕлĕ, вика, люцерна акса хăварасшăн».
