Чăваш Енре Пĕтĕм Раççейри "Астăвăм вахти" акцин чăваш регион тапхăрĕ ĕçлеме пуçланă. Акцие пуçарса йĕркелекенсем - Чăваш наци музейĕ тата "Раççейри шырав юхăмĕ" общество организацийĕн Чăваш Енри уйрăмĕ. Республикăра пурăнакансем Чăваш Енри шырав отрячĕсен ĕçĕ-хĕлне çутатакан куравпа паллашнă. Выставкăра Чăваш Енри шырав юхăмĕн 80-90-мĕш çулсенчен пуçласа паянхи кунчченхи аталанăвне халалланă материал пысăк вырăн йышăнать. Унтан акцие хутшăнакансем 1941 çулхи ноябрь уйăхĕн 4-мĕшĕнче нимĕç фашисчĕсем Шупашкар çине бомба пăрахнă вăхăтра вилнĕ хĕрачан вил тăприйĕ çине чечексем хунă. Çитес вăхăтра шырав отрячĕсем Тăван çĕршывăн Аслă вăрçи çулĕсенче çапăçусем пулнă вырăнсене кайма хатĕрленеççĕ.

Обсуждение закрыто