Пысăк Енккасси шкулĕнче иртнĕ кунсенче пĕлтерĕшлĕ пулăм пулса иртрĕ. 4-мĕш класра вĕренекенсене торжествăлла лару-тăрура кадетсен йышне илчĕç.
Пысăк Енккасси шкулĕнче кадет пĕлĕвне 2008 çултанпах йĕркеленĕ. Унтанпа 4 кадет класне вĕрентсе кăларнă. Выпускниксем паянхи кун та хăйсене çирĕп дисциплинăллă воспитани парса çитĕнтернĕшĕн шкула килсе вĕрентекенсене тав тăваççĕ. Çапла палăртать пурнăç хăрушсăрлăхĕн никĕсĕсен /ОБЖ\ предметне вĕрентекен Вячеслав Николаевич Иванов. Халĕ 10-мĕш класри кадетсемпе пĕрле малашне 4-мĕшĕнчисене те пурнăçри чи кирлĕ хăнăхтарусене вĕрентме тытăнĕ вăл. Паллах, класс руководителĕпе, Анна Владимировна Константиновăпа, ытти шкул ĕçченĕсемпе пĕрле. Çак кун шкула сумлă хăнасем йышлă пухăнчĕç. Вĕсен йышĕнче Вăрмарсен Шупашкарти ентешлĕхĕн вице-президенчĕ В.Нягин, Пĕтĕм Раççейри ирĕклĕ пушар обществин Чăваш Енри уйрăмĕн Çĕрпÿри подразделенийĕн представителĕсем А.Егоров, А.Сорокина, Чăваш Енри пушар хуралĕн ветеранĕ В.Петров, Вăрмар район администрацийĕн вĕрентÿпе çамрăксен политикин управленийĕн начальникĕн заместителĕ Н.Иванова, Пысăк Енккасси ял тăрăхĕн администрацийĕн пуçлăхĕ Л.Александрова, районти шкулсенчи вĕрентÿ енĕпе ĕçлекен заместительсем, кадетсен ашшĕ-амăшĕсем.
Кадет тумĕ тăхăннă 4-мĕш класра вĕренекен 20 ача сцена çине тухса тăчĕ. Шкул директорĕ Луиза Ивановна Кириллова шкул хушăвĕпе килĕшÿллĕн ачасене кадетсен йышне илме йышăннине пĕлтерчĕ, ачасене ăнăçу сунчĕ. «Клянемся, клянемся, клянемся», - тесе тупа турĕç кĕçĕн кадетсем. Çак ятпа вĕсене ятарлă удостоверенисем парса тухрĕç. Пурнăçри пĕрремĕш яваплă та тивĕçлĕ утăма тунă ятпа шкул ачисене хăнасем саламларĕç, кадет тумĕ ачасене шанăçлăх, çирĕплĕх кÿрессе, ашшĕ-амăшĕ пулăшса пырасса шаннине пĕлтерчĕç.
4-мĕш класри кадетсен командирĕ пулма шкула Кивĕ Мăнтăртан çÿрекен Давид Андреева суйланă. Малашне хăйĕншĕн кăна мар, пĕтĕм класшăн яваплă пулма тивĕ унăн.
Э.МИХАЙЛОВА.
