Ялхуçалăх ĕçченĕсемшĕн çураки чи яваплă тапхăр шутланать. Çуракине мĕнлерех шайра ирттернинчен кĕр тухăçĕ килет. Çакна "Ямуков Г.Н." хресчен /фермер/ хуçалăхĕнче тăрăшса вăй хуракансем лайăх ăнланаççĕ. Хресчен /фермер/ хуçалăх пуçлăхĕ Геннадий Николаевич Ямуков палăртнă тăрăх, вĕсен хуçалăхĕ çуракине çĕр проценчĕпех хатĕр.
Асăннă хуçалăха иртнĕ кунсенче çитсе курнă май çакна асăрхарăм: çуракине кĕске вăхăтра тата пахалăхлă ирттерме ялхуçалăх техникине юсаса çĕнетнĕ, çĕнĕ техника та туяннă. Хальхи вăхăтра кунти механизаторсем калчасене минераллă удобренипе апатлантарассипе тăрăшаççĕ. Унсăр пуçне кунти В.Васильев, С.Сидоров, Л.Амуров, С.Краснов, А.Илларионов, О.Иванов рабочисем çĕрулмине яровизацилеме кăлараççĕ /ÿкерчĕк çинче/.
Пĕтĕмĕшле илсен, кăçалхи çуракинче 600 гектар пĕрчĕллĕ культурăсене акма палăртнă. Çĕрулмине 200 гектар çинче лартма палăртнă. Çĕрулмин "Бриз", "Жуковский", "Гала", "Ред Скарлет", "Манифест", "Удача" сорчĕсене лартассипе тăрăшса вăй хураççĕ. Хресчен ?фермер% хуçалăх пуçлăхĕн заместителĕ Валерий Николаевич Ямуков каланă тăрăх, кашни çулах çĕрулмин çĕнĕ сорчĕсене туянса, вĕсене вырăнти çĕрсенче лартса-туса илессипе пысăк тимлĕх уйăраççĕ.
Çанталăк условийĕсем кăçал çуракине ирттерме каярах хăварчĕç пулин те, "Ямуков Г.Н." хресчен /фермер/ хуçалăхĕнче ĕçлекенсем ăна кĕске вăхăтра ирттерсе яма палăртаççĕ. Хальхи вăхăтра асăннă хуçалăхра йĕри-тавра ĕç шавĕ кĕрлет. Хĕвеллĕ кунăн кашни саманчĕпе туллин усă курса, агротехника требованийĕсене пăхăнса ĕçлеççĕ кĕлкешсем. Эппин вĕсене çак çăмăл мар ĕçре ăнăçу сунмалли кăна юлать.
З.ПАВЛОВА.
