Çу кунĕсем — йĕри тавралăха илем кĕртмелли, хăтлăлатмалли, строительство ĕçĕсене пурнăçламалли чи лайăх вăхăт. Çакна кура Вăрмар поселокĕнчи нумай хваттерлĕ çуртсен картишĕсенче хăтлăх кĕртмелли ĕçсем пыраççĕ.
Пурĕ поселокри 6 картиш территорине «Çурт-йĕр тата хула хутлăхĕ» наци проекчĕн «Хăтлă хула хутлăхне йĕркелесси» регион проекчĕпе килĕшÿллĕн хăтлăлатмалла. Ĕçсене май уйăхĕнче пуçланă, контрактпа килĕшÿллĕн сентябрĕн 15-мĕшĕ тĕлне вĕçлемелле. Константин Иванов ячĕллĕ урамра 3, 9, 11 çуртсен картиш территорине юсама 5 814 310 тенкĕ, Порфирьев урамĕнчи 11-мĕш тата Некрасов урамĕчи 12-мĕш номерлĕ çуртсен территорине юсама 2 677 760 тенкĕ, Заводская, 45-47 адреспа вырнаçнă картиш территорине хăтлăх кĕртме 3 776 350 тенкĕ, Зеленый тăкăрлăкри 3-7 çуртсен умĕнчи территорие хăтлăлатма 4 259 340 тенкĕ, Школьный тăкăрлăкĕ, 4-6, Энтузиастсен, 8 тата Молодежная,18 адреспа вырнаçнă территорие хăтлăлатма 6 340 450 тенкĕ уйăрнă. Тăватă объектĕнче «Данилов А.В.» тата тепĕр икĕ объектĕнче «Васильев А.В.» уйрăм çын предпринимательсен ĕçченĕсем тăрăшаççĕ.
Нумай хваттерлĕ çуртсен картишĕсене юсаса хăтлăх кĕртес ĕç шутне мĕн кĕрет-ха? Машинăпа çÿремелли çулсем, машинăсене лартмалли вырăнсем, тротуарсем туса хатĕрлесси, тавралăха ешĕллетесси, ларкăчсемпе урнăсем вырнаçтарасси. Кашни объектрах пур япали те пулмасан та, урнăсемпе ларкăчсем 6 территорире те пулĕç. Ĕçсем еплерех пынипе Вăрмарти территори пайĕн начальникĕ Александр Николаевич Виссарионов паллашсах тăрать.
Акă Энтузиастсен урамĕнче эпир пынă вăхăтра 9 çын ĕçлетчĕ. Кивĕ бордюрсене ватса пулас тротуарсем валли çĕре чаватчĕç, никĕс хатĕрлетчĕç «Васильев А.В.» уйрăм çын предприниматель ĕçченĕсем /ÿкерчĕк çинче\. Пурĕ 5 техника единицине явăçтарнă. Çак вăхăтрах поселкори Константин Иванов ячĕпе хисепленекен урамра та çул сармалли ĕçсем пыратчĕç. Эксакаватор-погрузчик вак чул тиесе пулас асфальтлă çул çине тăкатчĕ. Кунта «Данилов А.В.» уйрăм çын предпринимателĕн ĕçченĕсем — 6 çын ĕçлет, 2 техника явăçтарнă /ÿкерчĕк çинче\. Алексей Леонидович Алексеев мастер-прораб палăртнă тăрăх, ĕçсене май уйăхĕн 14-мĕшĕнче тытăннă, сентябрьте пĕтермелле.
Аса илтеретпĕр, çак пĕлтерĕшлĕ ĕçсем йăлтах «Хăтлă хула хутлăхне йĕркелесси» программăпа килĕшÿллĕн пурнăçланаççĕ.
Эвелина МИХАЙЛОВА
