«Стройком» тулли мар яваплă общество хăйĕн ĕçченĕсене, техникине тинех «Аниш» автоçул çине çĕнĕ асфальт сарма куçарчĕ. Тĕрĕссипе, çу тăршшĕпе, халĕ те, республикăри тĕрлĕ округсенче ĕçлеççĕ çул-йĕр ĕçченĕсем, асфальтлă çул сараççĕ.
Нумай пулмасть кăна «Вăрмар-Кавал-Нăрлат» автоçул çинче пĕтĕмĕшле 12 км тăршшĕ асфальт сарчĕç. Черет «Аниша» та çитрĕ. Уяр та хĕвеллĕ çанталăкпа усă курса пысăк хăвăртлăхпа ĕçлеççĕ халĕ, харăсах икĕ участокра та. Ирхине 8 сехетрен пуçласа тĕттĕмленичченех тăсăлать рабочисен ĕç кунĕ. Асфальт саракан икĕ техникăна ĕçлеттереççĕ, пĕри çул-йĕрĕн пĕр енĕпе, тепри – тепĕр енĕпе. Икĕ бригадăпа. Ĕçлекенсем хушшинче ытларах çамрăксем. Кунсерен 1-1,5 километр çула асфальт хурса пыраççĕ. Кашнинчех тĕрлĕрен. Аса илтеретпĕр, «Аниш» автоçула пĕтĕмĕшле 15 км тăршшĕ çĕнетмелле, çул-йĕр сарлакăшĕ 7 метртан кая мар пулса пымалла. Çĕнĕ асфальт хулăнăшĕ 7 сантиметрпа танлашать, 4 сантиметрĕ – тĕп сий, тепĕр 3 сантиметрĕ — тÿрлетсе якатакан сий. 
Çул хĕррисене асфальт тĕпренчĕкĕ сарса çирĕплетĕç. «Çу тăршшĕпе канмалли кунсемсĕр ĕçлерĕмĕр темелле. Эпир вăй хуракан «Стройком» организацин объекчĕсем республикăри тĕрлĕ районта пурнăçланаççĕ. Ĕç нумай», - каласа параççĕ çул-йĕр ĕçченĕсем. «Хĕлле канатăрах пуль çав пайне хăть», - тетĕп вĕсене. «Пирĕн начальник пекех каларăр эсир халĕ», - теççĕ рабочисем. Тĕрĕссипе, хĕлле те ĕçсĕр лармаççĕ. Çул-йĕре хĕлле юртан тасатса тăмалли те вĕсем çинчех иккен. Çĕнĕ çулпа автомашинăсем вĕçтереççĕ кăна халĕ, тинех кĕтсе илетпĕр теççĕ.
Эвелина МИХАЙЛОВА
