Кĕлкешри культура çурчĕн строительство объектĕнче черетлĕ ĕçлĕ канашлу иртнĕ. Ĕçлĕ визитпа унта Чăваш Республикин культура, национальноçсен ĕçĕсен тата архив ĕçĕн министрĕн тивĕçĕсене вăхăтлăх пурнăçлаканĕ Татьяна Васильевна Казакова пулчĕ. Кĕлкешре пурăнакансемшĕн çак паллă пулăм пулчĕ.
Татьяна Казакова кивĕ клуб вырăнĕнче хăпартса лартнă çĕнĕ культура çурчĕн строительствипе çыхăннă ĕçсемпе паллашрĕ. Ку объект строительствине «Çемье» наци проекчĕ тата «Культурăпа туризм аталанăвĕ» патшалăх программи шайĕнче пурнăçлаççĕ. Пĕтĕмĕшле проект хакĕ — 64 миллион тенкĕ. Çак суммăран 56 миллионне Чăваш Ен Правительстви пулăшнипе республика бюджетĕнчен уйăрнă. Çĕнĕ Культура çурчĕ 72-75 вырăнлăх пулĕ, шалта концертсемпе уявсем ирттерме пысăк та хăтлă зал, ял библиотеки пулĕ. Хальхи вăхăт тĕлне объект патне çутçанталăк газне илсе çитернĕ, шыв пăрăхне вырнаçтарнă, шалти ĕçсем пыраççĕ.
Çавăн пекех пушар сигнализацийĕ, çутатакан приборсем, видеокамерăсем, хутса ăшăтмалли тытăма вырнаçтарнă. Контрактпа палăртнă тăрăх, ĕçсене пĕтĕмĕшле 2027 çулхи январь уйăхĕнче вĕçлемелле, апла пулин те çĕнĕ культура çуртне кăçалхи декабрь уйăхĕнчех уçма палăртаççĕ. Татьяна Казакова ĕçсен хăвăртлăхĕпе пахалăхне пысăк хак панă. Вăл палăртнă тăрăх, çакăн пек учрежденисем йăла-йĕркесене упрамалли условисем туса пĕр ялта пурăнакансене кăна мар, юнашар ялсенчи çынсене те пĕр чăмăра пухăнма май параççĕ.
