Çак кунсенче Вăрмар поселокĕнчи Спорт çуртĕнче футзал енĕпе Вăрмар муниципаллă округĕн Суперкубокĕ иртнĕ. Мероприяти тĕллевĕ — футзал вăййине аталантарасси, халăхăн сывлăхне çирĕплетесси тата спортри пултарулăхне ÿстересси, чи вăйлă командăсене тупса палăртасси.
Суперкубокăн çурмафиналĕнче «Арапуç» команда «Легион» командăна çĕнтерме пултарнă. «Кивĕ Вăрмар» команда вара «Чулкас» командăран вăйлăрах пулнă. 3-мĕш вырăншăн иртнĕ матчра çивĕч тупăшура «Легион» команда «Чулкас» командăна çĕнтернĕ.
Финалта «Кивĕ Вăрмар» тата «Арапуç» командăсем тĕл пулнă. Хĕрÿ вăйă «Кивĕ Вăрмар» командăн çĕнтерĕвĕпе вĕçленнĕ, çапла киввăрмарсем Суперкубока тата 1-мĕш вырăншăн грамотăсемпе медальсене тивĕçнĕ. Призерсене те грамотăсемпе тата медальсемпе чысланă. Çавăн пекех чи пултаруллă спортсменсене тĕрлĕ номинацисенче палăртнă: Иван Григорьев /«Легион»/ — «Чи лайăх тапăнакан», Демьян Артемьев /«Кивĕ Вăрмар»/ — «Чи лайăх вăйăçă», Владислав Данилов /«Арапуç»/ — «Чи лайăх вратарь», Александр Павлов /«Кивĕ Вăрмар»/ — «Чи лайăх хÿтĕлевçĕ».
Александр КРАСНОВ, Вăрмар муниципаллă округĕн администрацийĕн культура, социаллă аталану тата спорт пайĕн начальникĕ
