Паян Вăрмар поселокĕнче ĕç шавĕ кĕрлет кăна. Çул-йĕрсен темиçе участокĕнче те асфальт сараççĕ, шăтăк-путăксене те тăрăшсах юсаççĕ. Акă, Мир урамĕнче «Инвестстрой» тулли мар яваплă общество ĕçченĕсем вăй хураççĕ. «Эпир пурĕ 8 çын ĕçлетпĕр, шăтăк-путăксене юсатпăр. Малтан Мир урамне якататпăр, унтан Заводская урамне куçăпăр», — пĕлтерчĕç çул-йĕр ĕçченĕсем.
Поселок центрĕнче те — Ленин, Советская, Свердлов урамĕсенче — хĕрÿ ĕç пырать. Кунта урăх бригада тăрăшать. «Шăтăк-путăксене паянах сапласа пĕтерĕпĕр. Майăн 9-мĕшĕ тĕлне кунта яка çул пулĕ», — терĕç ĕçлекенсем.
