Вăрмар тăрăхĕ республика, çĕршыв, тĕнче шайĕнче мала тухакан пултаруллă спортсменĕсемпе мухтавлă. Ентешĕмĕрсем спортăн кашни тĕсĕнчех хăйсене лайăх енчен кăтартаççĕ, Вăрмар округĕн чысне çÿллĕ шайра хÿтĕлеççĕ, тренерсен тăрăшулăхне тÿрре кăлараççĕ. Талантлă спортсменсем хушшинче Егор Аликович Григорьев çамрăк боксера палăртса хăвармалла.
Егор 2009 çулта Аслă Чак ялĕнче Екатерина Владимировнăпа Алик Валерьевич Григорьевсен çемйинче çуралса ÿснĕ, тăватă ывăлтан иккĕмĕшĕ вăл. Пĕчĕкренех спорт еннелле туртăннăскер пуçламăш классенче вĕреннĕ чухнех А.Ф. Федоров ячĕллĕ Вăрмарти спорт шкулĕн бокс уйрăмне çÿреме пуçланă. Геннадий Меркурьевич Николаев тренер, Чăваш Республикин физкультурăпа спортăн тава тивĕçлĕ ĕçченĕ патĕнче бокс енĕпе пултарулăхне тăватă çула яхăн туптанă. Тренировкăсенчен, ăмăртусенчен юлман спортсмен кĕçех çитĕнĕвĕсемпе палăрма тытăннă, тăтăшах çĕнтерÿ пьедесталĕ çине хăпарма тивĕçнĕ. Çавна кура Егора асăрханă, В.М. Краснов ячĕллĕ Шупашкарти олимп резервĕн училищине вĕренме йышăннă. Асăннă вĕренÿ заведенийĕнче вăл иккĕмĕш çул вĕренет ĕнтĕ, Владимир Викторович Железнов тренер патĕнче ăсталăхне аталантарать.
Çирĕп кăмăллă, мал ĕмĕтлĕ, тăрăшуллă боксер кулленех тĕрлĕ спорт ăмăртăвĕсенче малти вырăнсене йышăнать. Нумай пулмасть, акă, СВОра пуçне хунă паттăрсене асăнса Çĕнĕ Шупашкар хулинче бокс енĕпе Чăваш Республикин чемпионачĕ тата мала тухмалли ăмăртăвĕсем иртнĕ. Егор Григорьев çак ăмăртусенче 57 килограмм таякан спортсменсем хушшинче 1-мĕш вырăна çĕнсе илнĕ. 2025 çулта та вăл Чăваш Ен чемпионĕ пулса тăнă. Çавăн пекех пĕлтĕр, Чăваш Республикин пĕрлештернĕ команди йышĕнче пулнă май, Раççей шайĕнчи мала тухмалли ăмăртусене ăнăçлă хутшăнса хăйне лайăх енчен кăтартнă. Атăлçи Федераллă округĕн мала тухмалли ăмăртăвĕсенче те финала тухнă.
Çак кунсенче вара спортсменăн ашшĕ Алик Валерьевич тепĕр ырă хыпар та пĕлтерчĕ: Егор Григорьева бокс енĕпе «Спорт мастерĕн кандидачĕ» спорт разрячĕ панине çирĕплетекен хушу тухнă. Саламлатпăр! Малашне те çĕнтерÿсен çулĕпе утăмлама сунатпăр!
Ирина ДАНИЛОВА
