Ял хĕрарăмĕсен кунĕ тĕлне Вăрмар районĕнчи тĕп больницăра Уçă алăксен кунĕсем иртеççĕ.Пĕтĕм тĕнчери ял хĕрарăмĕсен кунĕ çывхарса пырать. Ăна октябрĕн 15-мĕшĕнче паллă тăваççĕ.
Пĕтĕм тĕнчери ял хĕрарăмĕсен кунĕ — ял аталанăвне, ял пурнăçне тÿпе хывакан хĕрарăмсен пархатарлă ĕçне хакланине çирĕплетекен праçник. Уяв тĕлне Вăрмар районĕнчи тĕп больницăра хĕрарăмсем валли Уçă алăксен кунĕсем иртеççĕ. Тухтăрсем патне маларах çырăнмасăрах консультаци илме тата профилактика тĕрĕслевĕсем витĕр тухма пулать.
Графикпе килĕшÿллĕн, уçă алăксен кунĕсем октябрĕн 1, 5, 8, 12, 14-мĕшĕсенче ирттереççĕ. Специалистсем хĕрарăмсен сывлăхĕпе çыхăннă программа хатĕрленĕ, мастер-классем, лекцисем ирттереççĕ. Терапевт, акушер-гинеколог консультацине илме, маммографи, УЗИ, ЭКГ, флюорографи тухма, лаборатори диагностики тума, юн пусăмне тата куçри пусăма виçме пулать. Алăра паспортпа медицина страхованийĕн полисĕ кăна пулмалла. Йышăнăва черет тăрса кĕмелле.
Вăрмар район больницин даннăйĕсем тăрăх, октябрĕн 1-мĕшĕнче тата 5-мĕшĕнче иртнĕ Уçă алăксен кунĕсенче специалистсем 81 хĕрарăма йышăнса вĕсен сывлăхне тĕрĕсленĕ, 30 хĕрарăм ультрасасă тĕрĕслевĕ тутарнă.
