Вăрмар тăрăхĕнчи Кĕлкеш ялĕнче çĕнĕ культура çурчĕн строительстви пырать. Ĕçсене «Çемье» наци проекчĕпе килĕшÿллĕн пурнăçлаççĕ.
Пĕтĕмĕшле проект хакĕ – 64 миллион тенкĕ, çак укçа-тенкĕрен 56 миллионне Чăваш Ен Правительстви республика бюджетĕнчен уйăрса панă. Культура çурчĕн пĕр хутлă кирпĕч объектне хăпартса лартнă. Строительство ĕçĕсене Канашри «Геолог» тулли мар яваплă обществăн ĕçченĕсем пурнăçлаççĕ. 20-е яхăн арçын стройкăра. Генеральнăй директорĕ — Сергей Николаевич Елисеев. Пĕтĕмĕшле объектри ĕçсене Владимир Анатольевич Павлов прораб йĕркелесе пырать. Культура вучахне, контрактпа палăртнă тăрăх, çитес çулхи январĕн 14-мĕшĕ тĕлне туса пĕтермелле. Владимир Анатольевич прораб пĕлтернĕ тăрăх, строительство ĕçĕсене декабрĕн пĕрремĕшĕ тĕлне вĕçлесшĕн. Хальхи вăхăт тĕлне объект патне газ илсе çитернĕ. Шалти ĕçсем пыраççĕ, культура çурчĕ умĕнче брусчатка сараççĕ. Культура çуртĕнче стенасемпе тÿпесем хатĕр, сăрламалли кăна юлнă. Залра сценăна туса пĕтернĕ. Пĕтĕмпе 72 вырăнлăх пулĕ культура вучахĕ. Зданире пушар хăрушсăрлăхĕн тытăмне вырнаçтарассипе ĕçлеççĕ, сантехниксем сантехника вырнаçтараççĕ. Çĕнĕ культура çуртĕнче библиотека, ялти территори пайĕн администрацийĕ те вырнаçĕç.
Кĕлкешсем чылай çул кивĕ пĕчĕк клуб çуртĕнче хĕсĕннĕ. Малашне вара вĕсемшĕн кружоксем йĕркелеме, мероприятисемпе уявсем, район шайĕнчи фестивальсем ирттерме паянхи пурнăçпа килĕшсе тăракан хăтлă вырăн пулĕ. Çĕнĕ культура вучахĕ йăла-йĕркесене упраса хăварса пĕр-пĕрин хушшинчи çыхăнăва çирĕплетме май парасса шанаççĕ кĕлкешсем.
Эвелина МИХАЙЛОВА
