Вăрмар районĕнче инвестициллĕ профиле — муниципалитет территорийĕнче инвестициллĕ ĕç-хĕле вăйлатмалли сĕнÿсен списокне — хатĕрлес тĕлĕшпе стратегиллĕ сесси иртнĕ.
Тĕлпулăва ЧР Экономика аталанăвĕн министерстви, «Чăваш Республикин инвестициллĕ аталанăвĕн агентстви» тата «Территорисен инвестициллĕ аталанăвĕн наци институчĕ» коммерциллĕ мар автономлă организацисем район администрацийĕпе пĕрле йĕркеленĕ.
Сесси ĕçне район администрацийĕн представителĕсем, ял тăрăхĕсен пуçлăхсем, предприятисемпе организацисен руководителĕсем, уйрăм çын предпринимательсем, районти активлă çамрăксен представителĕсем хутшăннă.
Пухăннисем умĕнче Вăрмар район администрацийĕн пуçлăхĕ Д.Иванов сăмах илнĕ, муниципалитетăн инвестициллĕ профильне туни пысăк пĕлтерĕшлĕ пулнине каланă. Стратегиллĕ сесси муниципалитет аталанăвне çынсем мĕнле курнине палăртма, вĕсен шухăшне муниципалитетăн инвестициллĕ профилĕнче шута илме май парать.
Тĕлпулăва хутшăнакансем халăха районти социаллă-экономикăллă лару-тăру мĕнлерех шайра тивĕçтернине палăртакан ыйтăмăн пĕтĕмлетĕвĕпе паллашнă. Вĕсем ушкăнсене пайланса ĕçленĕ, докладсене сÿтсе явнă, тĕп задачăсемпе тĕллевсене палăртнă, районта предпринимательлĕх ĕçĕ-хĕлĕн перспективлă енĕсене аталантармалли план йĕркеленĕ, кашни ушкăн хăйĕн планне презентациленĕ.
И.ДАНИЛОВА.
