Спортпа кăсăкланакансене Вăрмар район самбисчĕсен çитĕнĕвĕсемпе хаçат страницисем урлă паллаштарсах тăратпăр. Чăннипех те маттур вĕсем, пултаруллă, мал ĕмĕтлĕ, эпир, тренерсем, вĕсемшĕн тăрăшнине яланах тÿрре кăлараççĕ, савăнтараççĕ. Çак кунсенче ентешĕмĕрсем Чулхула облаçĕнчи Павлово хулинче регионсем хушшинче иртнĕ XXXXI турнира хутшăннă, 100 ытла спортсмен хушшинче палăрнă. Кирилл Яковлев 79 килограмран ытларах таяканнисем хушшинче, Артем Петров 71 килограмлисем хушшинче 1-мĕш вырăнсене йышăннă. Алексей Волков 79 килограмлисем хушшинче, Никита Лаврентьев 64 килограмлисем хушшинче 3-мĕш вырăнсене тивĕçнĕ /ÿкерчĕк çинче/.
А.Ф.Федоров ячĕллĕ Вăрмарти ачасемпе çамрăксен спорт шкулĕн выпускникĕн — Шупашкарти олимп резервĕн училищинче вĕренекен Илья Алексеевăн çитĕнĕвĕсем те курăмлă. Нумаях пулмасть Самара облаçĕнче иртнĕ Пĕтĕм Раççей шайĕнчи турнирта Илья 3-мĕш вырăна тухнă. Шупашкар хулинчи Илья Капустин вара 1-мĕш вырăн йышăннă, Раççей спорт мастерĕн нормативне пурнăçланă.
Л.УЛИВАНОВ, И.НИКИТИН, тренерсем.
