«Вăхăт сисĕнмесĕрех иртет» текен каларăшпа пурте килĕшеççĕ пулĕ. Акă каллех çулталăк вĕçленсе пырать, çавна май хаçат-журнал тата почта ĕçченĕсемшĕн хĕрÿ тапхăр пуçланнă — çырăнтару.
Иртнĕ кунсенче çырăнтарупа, Вăрмарти почтамтăн ĕçĕ-хĕлĕпе çыхăннă тата ытти ыйтусене сÿтсе явас тĕллевпе Вăрмар район администрацийĕнче ĕçлĕ тĕлпулу иртрĕ. Унта Вăрмар район администрацийĕн пуçлăхĕ Д.Иванов, Вăрмар муниципалитет округĕн депутачĕсен Пухăвĕн председателĕ Ю.Иванов, районти «Хĕрлĕ ялав» хаçатăн тĕп редакторĕ З.Павлова, Вăрмарти почтамтăн начальникĕ И.Николаева, çавăн пекех «Раççей почти» федераллă патшалăх унитари предприятийĕн республикăри почта çыхăнăвĕн Управленийĕн руководителĕн заместителĕ П.Никифоров тата ЧР Патшалăх Канашĕ кăларакан «Республика» хаçатăн тĕп редакторĕ М.Арланов хутшăнчĕç.
Вăрмарти почтамтăн начальникĕ И.Николаева районта çырăнтару мĕнле пынипе паллаштарчĕ, çав шутра «Хĕрлĕ ялав» хаçата çырăнтарасси пирки те чарăнса тăчĕ. «Район хаçачĕ кашни килех çиттĕр тесе тăрăшатпăр, ăна унчченхи тапхăртинчен кая мар çырăнтарас тетпĕр», — терĕ Ирина Петровна.
Вăрмар район администрацийĕн пуçлăхĕ Д.Иванов тата «Хĕрлĕ ялавăн» тĕп редакторĕ З.Павлова район хаçачĕн ĕçĕ-хĕлĕ пирки сăмах хускатнă май чăвашла тухакан хаçатăн пĕлтерĕшĕ тăван чĕлхене, тăван культурăна аталантарас ĕçре пысăк пĕлтерĕшлĕ пулнине каларĕç.
«Раççей почти» федераллă патшалăх унитари предприятийĕн республикăри почта çыхăнăвĕн Управленийĕн руководителĕн заместителĕ П.Никифоров палăртнă тăрăх, пичет изданийĕсен тиражне ÿстересси хальхи вăхăтра вĕсемшĕн малти вырăнта. Кăмăл тăвакансем «Ырăлăх йывăçĕ» акцине хутшăнса ваттисен çурчĕсем, ачасен реабилитаци центрĕсем, ытти организацисем валли хаçат-журнал çырăнса пама пултараççĕ. Çыхăну уйрăмĕсен ĕçĕ тухăçлăрах пултăр тесен вĕсен пурлăхпа техника базине те тимлĕх уйăрмалла. Петр Николаевич çитес вăхăтра Шăхаль, Кивĕ Вăрмар, Кĕтеснер ялĕсенче çыхăну уйрăмĕсем валли çĕнĕ çуртсем тума палăртнине пĕлтерчĕ.
Тĕрлĕ ыйтусене сÿтсе яврĕç тĕлпулура, тĕп вырăнта вара çырăнтару ыйтăвĕ пулчĕ. Сиссе те юлаймăпăр, çĕнĕ çула та кĕрĕпĕр. Çавăнпа та, хисеплĕ вулаканăмăрсем, «Хĕрлĕ ялав» хаçата 2023 çулхи пĕрремĕш çурçуллăхра илсе тăмашкăн çырăнма васкăр, актуаллă информаципе вăхăтра паллашса тăрăр, пурнăçпа тан утăр!
И.ДАНИЛОВА.
