Вак тата вăтам предпринимательлĕх кунĕ шайĕнче Вăрмар районĕнче ĕçлĕ тĕлпулу иртнĕ. Унта районти предпринимательсем, райадминистраци представителĕсем, республикăри «Манăн бизнес» Центрăн команди хутшăннă.
Мероприятине уçса Вăрмар муниципалитет округĕн депутачĕсен Пухăвĕн председателĕ Ю.Иванов сăмах илнĕ. Юрий Анатольевич пухăннисене районти вак предпринимательлĕх 2022 çулхи 9 уйăх хушшинче мĕнле аталанса пынипе паллаштарнă, çакăн евĕр мероприятисем пысăк пĕлтерĕшлĕ пулнине палăртнă, мĕншĕн тесен предпринимательсем хăйсен ыйтăвĕсене пама, пĕр-пĕрин опычĕпе паллашма, çĕнĕ идейăсене сÿтсе явма пултараççĕ.
Вак тата вăтам предпринимательлĕхе патшалăх кÿрекен пулăшу формисем пирки Чăваш Республикинчи «Вак тата вăтам предпринимательлĕхе пулăшу кÿрессипе тата халăха ĕçпе тивĕçтерессипе ĕçлекен республикăри бизнес-инкубатор» автономлă учрежденин руководителĕ И.Тумаков каласа панă.
«В чем удобство безналичных платежей» информаципе Чăваш Республикин наци банкĕн представителĕ И.Ильин паллаштарнă.
Малалла тĕлпулăва хутшăнакансем 4 секцине пайланса калаçнă: укçасăр пулăшусем, укçан паракан пулăшусем, туризм аталанăвĕ, бизнеса хÿтĕлессипе налуксем тÿлесси. Районти предпринимательсем хăйсен ĕçĕпе çыхăннă ыйтусем çине хуравсем, усăллă информаци илме пултарнă.
Çулсерен районта Вак тата вăтам предпринимательлĕх кунне йĕркелесе ирттернĕшĕн тата предпринимательлĕх пуçарулăхне пулăшу кÿнĕшĕн Вăрмар район администрацийĕн экономика тата çĕрпе пурлăх хутшăнăвĕсен пайĕн начальникĕ Л.Степанов тата тĕп специалист-эксперчĕ А.Ильина республикăри бизнес-инкубаторăн тав хучĕсене тивĕçнĕ.
Мероприятин тĕп пайĕ вĕçленсен хăнасем «Овас-Спорт» тулли мар яваплă обществăн ĕçĕ-хĕлĕпе паллашнă. Çĕвĕ предприятийĕнче ачасем валли ăшă тумтир, активлă кану валли тумсем çĕлеççĕ. Цех начальникĕ Л.Семенова экскурси ирттернĕ, çĕлекен продукцин ассортименчĕпе паллаштарнă, предприятин историйĕ тата аталану перспективи çинчен каласа панă.
Л.СТЕПАНОВ, райадминистрацин экономика тата çĕрпе пурлăх хутшăнăвĕсен пайĕн начальникĕ.
