Сисĕнмесĕрех календарьти паллă датăсем пĕрин хыççăн тепри улшăнса пыраççĕ, черетлĕ професси уявĕ — Шалти ĕçсен органĕсен сотрудникĕн кунĕ çывхарса çитет. Вăрмар районĕнче пурăнакансен лăпкă пурнăçне, право йĕркине, саккуна пăхăнассине сыхлакансем — Раççей Шалти ĕçсен министерствин муниципалитетсем хушшинчи «Урмарский» уйрăмĕн сотрудникĕсем. Вĕсем талăкăн кирек епле вăхăтĕнче те йĕркепе тивĕçтерекенсем. Ыттисен уяв пулсан, вĕсен — ĕç.
2021 çулхи март уйăхĕнчен пуçласа уйрăма Сергей Григорьевич Мочалов полици подполковникĕ ертсе пырать. Пĕчĕк мар коллектива пĕр тĕвĕре тытса пырса пирĕн районшăн çав тери пĕлтерĕшлĕ пысăк ĕç пурнăçласа пыраççĕ, район администрацийĕпе, вĕрентÿпе çамрăксен политикин управленийĕпе, прокуратурăпа тата ытти органсемпе тачă çыхăнса ĕçлеççĕ.
Полици ĕçĕнчи кăтартусемпе çитĕнÿсем кулленхи тăрăшуллă, çине тăрса вăй хуракан ĕç кунĕсенчен йĕркеленеççĕ. Ирхине 8 сехетре сотрудниксем планеркăна пухăнаççĕ, иртнĕ талăкри район территорийĕнчи лару-тăрăва тишкерсе хак параççĕ, кун йĕркинче туса ирттермелли ĕçе палăртаççĕ. Каçхине 6 сехетре кун каçа мĕн пулса иртнине, мĕнле мерăсем йышăннине сÿтсе явма тепĕр хутчен акт залĕнче пуçтарăнаççĕ. «Урмарский» полици уйрăмĕнчи пур подразделенире те хăйсен професси тивĕçне яваплăха туйса пурнăçлакан сотрудниксем ĕçлеççĕ, кашнин хăйĕн тивĕçĕ. «Урмарский» уйрăмĕнче уголовлă шырав, участокри уполномоченнăйсен, следстви, дознани пайĕсем, тыл, конвой службисем, дежур чаçĕ, инспектор-кинолог, эксперт-криминалист – пурте пĕр-пĕринпе тачă çыхăнура.
Паллах, професси тивĕçне пурнăçланă май пултаруллăрах та тăрăшуллăраххисем палăраççĕ. Çакăн пек сотрудниксене хавхалантармашкăн вĕсен сăнÿкерчĕкĕсене Сергей Григорьевич Мочалов начальникăн пуçарулăхĕпе 2021 çултан Хисеп хăми çине вырнаçтарма пуçланă. Акт залĕнче çакăнса тăракан Хисеп хăми çинче паянхи кун ыттисемшĕн ырă тĕслĕх кăтартакан 9 сотрудник сăнÿкерчĕкне, ятне вырнаçтарнă. 2022 çулхи ĕç кăтартăвĕсене пĕтĕмлетнĕ хыççăн çĕнĕ çултан Хисеп хăми ыттисемпе ылмашăнĕ.
Сотрудниксен ĕç условийĕсене лайăхлатас тĕллевпе çине тăрса ĕçлеççĕ. Айăпланакансемпе шиклентерекен çынсене вăхăтлăх тытмалли изолятора тĕпрен юсанă, гаража юсаса çĕнетнĕ. Чи пĕлтерĕшли - Çул-йĕр хăрушсăрлăхĕн патшалăх инспекцийĕн Вăрмар районĕнчи уйрăмне тĕпрен çĕнетнĕ. Миграци пункчĕ /малтан паспорт сĕтелĕ теттĕмĕр\ поселокри Ленин урамĕнчен кĕçех каялла хăй вырăнне — ГИБДД пайĕ вырнаçнă çурта таврăнĕ.
Полици ĕçченĕсем эрнере пĕр кун çапăçура кирлĕ мелсемпе хăнăхтарусем ирттереççĕ, çĕнĕ саккунсене ăша хываççĕ. Уйăхне икĕ кун пăшалтан тĕл перессипе ăмăртаççĕ. Çапла вĕсем хăйсене çирĕплетсех тăраççĕ. «Коллектив туслă, çынсен прависемпе ирĕклĕ пурнăçне хÿтĕлес тĕллевпе палăртнă задачăсене пурнăçлама яланах хатĕр», - тет «Урмарский» уйрăмĕн начальникĕ С.Мочалов.
Пурте пĕлетпĕр ĕнтĕ, «Урмарский» уйрăм тытăмне Тăвай районĕнчи пай та кĕрет. Ăна полици подполковникĕ В.Обаськин ертсе пырать. Çавăн пекех «Урмарский» уйрăм коллективĕ кунта ĕçлесе тухнă ветерансемпе тачă çыхăнура. Граждансен ыйтăвĕсене татса парас тĕллевпе уйрăм çумĕнче Обществăлла канаш ĕçлет, унăн председателĕ шăпах та шалти ĕçсен органĕсен ветеранĕ Геннадий Николаевич Васильев. Ветерансен канашĕн председателĕ Юрий Алексеевич Петров. Вĕсем паянхи кун та сотрудниксен ĕçĕпе кăсăкланса тăраççĕ, хăйсен ĕç опычĕпе паллаштараççĕ.
Полици сотрудникĕсене уяв ячĕпе саламлатпăр!
Э.МИХАЙЛОВА.
