«Ялта чи лайăххисем» /«Лучшие на селе»\ республикăри ачасемпе çамрăксен I форумĕ шайĕнче Шупашкарти Трактор тăвакансен Культура керменĕнче «Ялти телейлĕ ачалăх» /«Счастливое сельское Детство»/ республика конкурсне хутшăнакансене наградăлассипе савăнăçлă мероприяти иртрĕ. Ăна Чăваш Республикинчи ял хуçалăх тата тирпейлекен промышленноç ĕçченĕн кунне халалланă.
Форумăн хисеплĕ хăнисем хушшинче ЧР Пуçлăхĕ О.Николаев, ЧР Министрсен Кабинечĕн Председателĕн заместителĕ — ЧР ял хуçалăх министрĕ С.Артамонов, ЧР культура, национальноçсен ĕçĕсен тата архив ĕçĕн министрĕ С.Каликова, ЧР вĕрентÿпе çамрăксен политикин министрĕн пĕрремĕш заместителĕ А.Лукшин, Чăваш патшалăх аграри университечĕн ректорĕ А.Макушев, РФ Федераллă Пухăвĕн Патшалăх Думин финанс рынокĕпе ĕçлекен Комитечĕн председателĕ А.Аксаков, Чăваш Республикинчи Хĕрарăмсен Союзĕн председателĕ Н.Николаева тата ыттисем те пулчĕç.
Чăваш Республикинчи ял хуçалăх тата тирпейлекен промышленноç ĕçченĕн кунне халалласа ачасемпе çамрăксем хушшинче иртнĕ конкурса республикăри ача сачĕсенчи, шкулсенчи 7 пине яхăн ача хутшăннă. Вĕсем юрăсем юрласа, ташăсем ташласа, картинăсем ÿкерсе, çавăн пекех сăмах ăсталăхĕнче хăйсен пултарулăхне кăтартнă. Конкурсра мала тухнисем хушшинче Вăрмар район представителĕсем те пур. Акă, Чупайри тĕп шкулти София Петрова «Художествăлла сăмах» номинацинче 5-9 классем хушшинче 1-мĕш пулнă /руководителĕ Л.Цыфаркина\. Пысăк Енккассинчи вăтам шкулти Карина Артемьева «Публикацисем» номинацинче 5-9 классем хушшинче çĕнтернĕ /руководителĕ И.Иванова\. Çак номинацинчех 10-11 классем хушшинче Г.Е.Егоров ячĕллĕ Вăрмарти вăтам шкулти Карина Алексеева 1-мĕш вырăна тухнă /руководителĕ Е.Ларионова\.
В.Д.Николаев ячĕллĕ Мăнçырмари вăтам шкулти Арсений Цыркунов «Публикацисем» номинацинче 1-4 классем хушшинче 2-мĕш пулнă /руководителĕ А.Васильева\. Энĕшпуçри вăтам шкулти Юлия Иванова та çак номинацинчех 5-9 классем хушшинче 2-мĕш вырăна тухнă /руководителĕ И.Иванов\. Пысăк Енккассинчи вăтам шкулти ачасен коллективĕ «Юрă» номинацинче 1-4 классем хушшинче 2-мĕш вырăна тивĕçнĕ /руководителĕ Т.Гаврилова/.
«Родничок» ача садĕнчи Элина Ларионова «Ÿкерчĕк» номинацинче 3-мĕш пулнă /руководителĕ Н.Михайлова/. «Родничок» ача садĕнчи «Радуга» тата «Капелька» ушкăнсенчи ачасем «Ташă» номинацинче 3-мĕш вырăна йышăннă /руководителĕсем Н.Михайлова, Е.Иванова, Н.Федотова, Л.Ковалевская/. Г.Е.Егоров ячĕллĕ Вăрмарти вăтам шкулти Полина Дмитриева «Художествăлла сăмах» номинацинче 1-4 классем хушшинче 3-мĕш вырăна тухнă /руководителĕ М.Михеева/.
2023 çула Телейлĕ ачалăх çулталăкĕ тесе йышăннине кура асăннă мероприяти пĕлтерĕшлĕ.
К.ПУДРИКОВА, районти Ача-пăча творчество çурчĕн директорĕ.
