«Хăрушлăхсăр паха çулсем» наци проекчĕн тĕллевĕсенчен пĕри — çул-йĕр çинче кашни çынна хăрушсăрлăхпа тивĕçтересси, 2030 çул тĕлне çынсем çул çинче вилессине 3,5 хут чакарасси.
Ноябрĕн 1-20-мĕшĕсенче, «Хăрушлăхсăр паха çулсем» наци проекчĕ шайĕнче, «Учи.ру» вĕрентÿ платформинче 1-9 классенче вĕренекенсем валли çул-йĕр çинчи хăрушсăрлăх темипе онлайн-тестировани — «Хăрушлăхсăр çулсем» олимпиада иртет. Ăна кăçалхипе виççĕмĕш хут ирттереççĕ. Заданисенче — çул çинче пулма пултаракан тĕрлĕ пулăмсем. Участниксен кашни пулăмпа тĕрĕс тата хăрушлăхсăр йышăну тумалла. Заданисен йывăрлăхĕ олимпиадăна хутшăнакансен çул ÿсĕмĕнчен килет.
Олимпиадăна хутшăнакансене пурне те сертификатсем параççĕ, çĕнтерÿçĕсене вара — грамотăсемпе дипломсем. Ашшĕ-амăшĕсемпе вĕрентекенсен олимпиадăна хутшăнма «Учи.ру» онлайн-платформăра регистраци тумалла та харпăр хăй кабинетĕнчен олимпиада страници çине куçмалла.
Çитĕннĕ çынсемпе автомобилистсем вара «Çул-йĕр легендисем» /«Легенды дорог»\ теста хутшăнса çул-йĕр правилисене хăйсем мĕнле пĕлнине тĕрĕслеме пултараççĕ. «Çул-йĕр легендисем» тестăн ыйтăвĕсенче пирĕнтен кашниех кунсерен лекме пултаракан лару-тăрусене сăнланă. Ыйтусем çине хуравланă хыççăн карточка-статус параççĕ, унта çул-йĕр правилисенчен хăшне пĕлменнине палăртаççĕ.
Вăрмар районĕнчи шкулсенче вĕренекенсем «Хăрушлăхсăр çулсем» олимпиадăна активлă хутшăнаççĕ. Вĕсем хушшинче — Г.Е.Егоров ячĕллĕ Вăрмарти пĕтĕмĕшле пĕлÿ паракан вăтам шкулта вĕренекен Артур Сапаркин. Вăл олимпиадăна хутшăннишĕн савăнать, унти ыйтусем интереслĕ те усăллă пулнине палăртать. Артурăн амăшĕ Ольга Петровна ачасем хушшинче çакăн пек олимпиадăсем ирттерни вĕсене çул çинче инкеке лекессинчен упраса хăварма, çакăн пек инкексен шутне чакарма пулăшĕ тесе шутлать.
И.Данилова.
