Ж.Дмитриева, Вăрмарти халăхăн социаллă ыйтăвĕсене тивĕçтерекен комплекслă центрăн директорĕ: «Халăха пăшăрхантаракан ыйтусем çине хуравсем парас тĕллевпе тÿрĕ эфирсем ирттересси Чăваш Республикинче йăлана кĕрсе пырать.
Паян, акă, Регион Пуçлăхĕ Олег Николаев тÿрĕ эфира тухса республикăра пурăнакансен ыйтăвĕсем çине хуравларĕ, мобилизациленĕ граждансен çемйисемпе ачисем тивĕçекен пулăшу мерисемпе паллаштарчĕ, координаци центрĕсен ĕçĕ-хĕлĕ çинчен каласа кăтартрĕ.
«Пирĕн тĕллев — мобилизациленĕ граждансене тата вĕсен çемйисемпе ачисене укçа-тенкĕ енчен пулăшасси, психологи пулăшăвĕ кÿресси, реабилитаци ĕçне пурнăçласси», — терĕ Олег Алексеевич.
Ыйтусем сахал мар пулчĕç, кашни ыйтăвĕнчех — çынсен чун ыратăвĕ, пăшăрханăвĕ. Çапла пулмасăр, эпир халĕ çăмăл мар тапхăрта пурăнатпăр, çавăнпа пĕр-пĕрне пулăшмалла, йывăрлăхсемпе çума-çумăн тăрса кĕрешмелле. Республика Правительстви нуша куракан кашни çынна пулăшассипе тĕрлĕ ĕçсем пурнăçлать, мобилизациленĕ граждансен çемйисемпе ачисен пурнăçне çăмăллатас тесе тăрăшать.
Пирĕн районта та, халăхăн социаллă ыйтăвĕсене тивĕçтерекен комплекслă центр çумĕнче, психологипе консультаци пункчĕ ĕçлет. Эпир мобилизациленĕ граждансен çемйисене пурне те шута илнĕ. Пирĕн пата мобилизаци ыйтăвĕсемпе пыракан е шăнкăравлакан çынсене пĕтĕм енчен пулăшу пама хатĕр».
