Совет Союзĕн Правительстви пирĕн çарсене Афганистан территорийĕнчен илсе тухнăранпа 33 çул та иртрĕ. Афган вăрçи совет халăхĕшĕн вунă çула тăсăлнă, хăрушă хирĕçтăрура Совет Союзĕ 15 пине яхăн салтака çухатнă.
Афган вăрçине Вăрмар район çыннисем те хутшăнса паттăрлăх кăтартнă. Вĕсен хушшинче — Виталий Петрович Николаев /ÿкерчĕк çинче сулахайран 5-мĕш\. Урал тăрăхĕнче çуралнă вăл, ачалăхĕпе çамрăклăхĕ Энĕшпуç ялĕнче иртнĕ.
1984 çулта салтак ячĕ тухсан малтанах 3 уйăх вĕренÿре пулнă, унтан çамрăка Афганистана янă. Виталий Петрович Кандагар провинцийĕнче службăра тăнă. Сержант званине панă ăна. Служба вăхăтĕнче тĕрлĕ операцисене хутшăннă, колоннăсене хуралланă, засадăсене хирĕç тăнă.
Тăван киле Виталий Петрович 1986 çулта Хĕрлĕ Çăлтăр орденĕпе таврăннă. Ăна вăл çар заданине ăнăçлă пурнăçланăшăн тивĕçнĕ. Унсăр пуçне ытти наградăсем те парса чысланă ăна.
Хальхи вăхăтра Виталий Петрович çемйипе Чупай ялĕнче пурăнать, стройка ĕçĕнче ĕçлет. Мăшăрĕпе пĕрле икĕ ывăл çуратса ÿстернĕ, пурнăç çулĕ çине кăларнă. Вĕсене икĕ мăнукĕ савăнăç кÿреççĕ.
