Çак кунсенче А.Ф.Федоров ячĕллĕ Вăрмарти ачасемпе çамрăксен спорт шкулĕнче Олимп чемпионĕн В.С.Соколовăн парнисене çĕнсе илессишĕн бокс енĕпе иртнĕ республикăри I турнира хутшăнакан çамрăк боксерсем те çак сăмахсене тĕпе хуни палăрчĕ. 7, 8-9, 11, 12, 13, 15-16 çулсенчи арçын ачасем турнир наградисене çĕнсе илессишĕн хăйсене те, пĕр-пĕрне те шеллемерĕç темелле, пĕтĕм вăйне парса боксла çапăçрĕç, бокс — вăйлисен спорчĕ пулнине çирĕплетрĕç.
Палăртса хăвармалла, Валериан Сергеевич Соколов — Чăваш Енрен тухнă чи пĕрремĕш олимп чемпионĕ, СССР тава тивĕçлĕ спорт мастерĕ, Мехикора иртнĕ XIX Олимп вăййисен чемпионĕ, тăватă хутчен СССР чемпионĕ, виçĕ хутчен СССР Кубокĕн çĕнтерÿçи.
Спорт мероприятийĕн торжествăлла пайĕнче пухăннисем умĕнче саламлă сăмахсемпе ЧР физкультурăпа спорт министрĕн заместителĕ А.Чернов, Вăрмар район администрацийĕн пуçлăхĕн пĕрремĕш заместителĕ В.Александров, Вăрмар хула тăрăхĕн администрацийĕн пуçлăхĕ А.Петров, Вăрмарсен Шупашкарти ентешлĕхĕн президенчĕ И.Аверьянов, Вăрмар район прокурорĕ Д.Александров, Вăрмарти муниципаллă округăн депутачĕсен Пухăвĕн депутачĕ, Пинерти тĕп шкул директорĕ, В.Соколовăн тăванĕ Г.Боредский, А.Ф.Федоров ячĕллĕ Вăрмарти ачасемпе çамрăксен спорт шкулĕн директорĕ С.Архипов, ЧР физкультурăпа спортăн тава тивĕçлĕ ĕçченĕ, А.Ф.Федоров ячĕллĕ Вăрмарти ачасемпе çамрăксен спорт шкулĕнчи бокс уйрăмĕн тренер-преподавателĕ, ăмăртусен тĕп судйи Г.Николаев, РФ физкультурăпа спортăн отличникĕ, ЧР физкультурăпа спортăн тава тивĕçлĕ ĕçченĕ, Çĕрпÿ районĕнчи бокс Федерацийĕн председателĕ Н.Ремеслов тухса калаçнă, боксерсене ăнăçу суннă. Районăн спорт пурнăçне активлă хутшăнакан, сывă пурнăç йĕркине пропагандăлакан çынсене Вăрмар район администрацийĕн тав çырăвĕсемпе, районăн обществăлла-политикăлла пурнăçĕнчи активистсене вара «Единая Россия» партин Чăваш Республикинчи уйрăмĕн тав çырăвĕсемпе чысланă.
Турнира Вăрмар, Красноармейски, Сĕнтĕрвăрри, Элĕк, Çĕрпÿ районĕсенчи, Шупашкар, Чĕмпĕр хулисенчи 100-е яхăн чи вăйлă спортсмен хутшăнчĕ. Спортзал варринче ятарласа вырнаçтарнă ринг тавра куракансем нумайăн пуçтарăнчĕç. Кашни раунд çав тери çивĕч иртрĕ. Çамрăк боксерсем пурте питĕ хастар пулчĕç, малти вырăнсене вара чи пултаруллисем йышăнчĕç. Ÿт-пÿ йывăрăшне кура хăйсен категорийĕсенче çĕнтернисене I степеньлĕ Дипломсемпе, медальсемпе, хаклă парнесемпе чысларĕç, призерсем вара Дипломсемпе медальсене тивĕçрĕç. 1-мĕш вырăнсене йышăннисем хушшинче Вăрмар район боксерĕсем те пулчĕç. Ку вăл Егор Григорьев, Даниил Чернышенко, Никита Михайлов, Дмитрий Алексеев.
Кирек мĕнле пулсан та ыттисен те кулянмалла мар. Рой Джонс профессионал-боксер палăртнă тăрăх, чăн-чăн чемпионсем вĕсем — пĕр тытăçура выляса янă, анчах тепринче ринг çине тухса хăйсем мĕне тăнине кăтарма пултаракансем.
И.ДАНИЛОВА.
