Çĕнĕ çул — пурте кĕтекен асамлă уяв. Эпир ăна яланах чи ырă туйăмсемпе чăтăмсăррăн кĕтетпĕр. Çĕнĕ çулта пĕр-пĕрне савăнтарасси, пулăшасси йăлана кĕнĕ.
Раççейĕпех иртекен «Ĕмĕтсен елки» акци шайĕнче Вăрмар райповĕнче уяв умĕн савăнăçлă мероприяти иртрĕ. Вăрмар райповĕн тытăмĕнче ĕçлекенсен хĕр-ывăлĕсене Хĕл мучи парнисемпе савăнтарчĕç.
Мероприятине Вăрмар райпо Канашĕн председателĕ М.Сейфуллина тата потребкоопераци ĕçченĕсен профсоюзĕн Чăваш Республикинчи комитечĕн председателĕ Ю.Иванова хутшăнчĕç.
Вăрмар райповĕнче водительте ĕçлекен Ю.Семеновăн 4 ача, вĕсенчен пĕрин, Глебăн, ĕмĕчĕ — йĕлтĕрлĕ пуласси. «Ĕмĕтсен елки» акци унăн ĕмĕтне пурнăçларĕ, Глеб Хĕл Мучипе Юр пикен аллинчен йĕлтĕр тата пылак парне илчĕ, унăн пĕртăванĕсене те пылак парнесемпе савăнтарчĕç.
Операторта ĕçлекен Н.Архипован мăшăрĕ ятарлă çар операцине хутшăнать. Çак çемьере çитĕнекен Есенийăпа Ульянăн та ĕмĕчĕсем пурнăçланчĕç. Хĕл Мучипе Юр пике вĕсене роликлă коньки тата витĕнмелли пледлă çемçе тетте парнелерĕç, çавăн пекех пылак парнесем пачĕç.
Ачасем Çĕнĕ çул çинчен сăвăсем каларĕç, унтан пурте пĕрле капăр чăрăш тавра карталанса ташларĕç.
