В.СЕМЕНОВ, «АгроРесурсы» тулли мар яваплă общество директорĕн заместителĕ:
Чăваш Ен Пуçлăхĕ Чăваш Республикин Патшалăх Канашне кашни çул яракан Çырупа паллаштарчĕ. Çыру тулли содержаниллĕ, мĕншĕн тесен ăна республикăра пурăнакан çынсен кăмăл-шухăшĕпе килĕшсе хатĕрленĕ. ЖКХ, сывлăх сыхлавĕ, строительство, çул-йĕр, ял хуçалăхĕ... Олег Николаев палăртнă тăрăх çак ыйтусем çулталăк тăршшĕпех тĕпре пулĕç.
Кăçал пирĕн республикăра ял хуçалăх отраслĕнче нихăçанхинчен ытларах тĕш тырă туса илме пултарни савăнтарать. О.Николаев хăйĕн çырăвĕнче çĕр ĕçне, ял пурнăçне хисеплени куç умĕнче. Пушă выртакан пĕр лаптăк çĕр те пулмалла маррине аса илтерчĕ. Хăмла туса илекенсене те пулăшассине ÿстерме шантарчĕ. ЧР Правительствине аграрисене пулăшу кÿмелли çĕнĕ мерăсем туса хатĕрлеме сĕннĕ.
