Иртнĕ кунсенче савăнăçлă лару-тăрура Вăрмар муниципаллă округĕн пуçлăхĕн В.Шигильдеевăн аллинчен 5 çемье ятарлă свидетельствăсем илнĕ. Пурăнмалли çуртлă е хваттерлĕ пулас тесе черетре тăнă пулнă 5 çемье ипотека кредичĕ илнĕ чухне пĕрремĕш тÿлевне тÿлесе татма ирĕк паракан свидетельствăсене тивĕçнĕ.
Субсидие Чăваш Республикин социаллă-экономикăлла аталанăвĕн программи, çавăн пекех «Пурăнмалли çурт-йĕр» наци проекчĕ шайĕнче уйăраççĕ. Тÿлев сумми туянакан çурт-йĕр хакĕнчен 20 процентран иртмест.
Василий Викторович çемьесене чун-чĕререн саламланă, пурăнмалли çурт-йĕр туяннă май çакăн пек пулăшу кÿни пысăк пĕлтерĕшлĕ пулнине, ыранхи куна шанчăклă пăхма май панине палăртнă. Унăн саламлă сăмахĕсем çумне Чăваш Республикин Ипотека корпорацийĕн суту-илÿ тата клиентсемпе ĕçлекен департаменчĕн директорĕ Д.Круглов та хутшăннă.
Н.ШИШКИНА.
