Çак кунсенче Чупай ялĕнче йĕлтĕрпе чупассипе район шайĕнчи ăмăртусем иртрĕç. Мероприятине йĕлтĕрпе чупассипе Раççей спорт мастерне, «Хăюлăхшăн» орденăн кавалерне, Украинăри ятарлă çар операцийĕнче паттăрла пуçне хунă Владимир Петрович Сергеев аслă лейтенанта асăнса йĕркеленĕ.
Владимир Сергеев 1997 çулта Патти ялĕнче çуралса ÿснĕ, кĕçĕн классенче тăван ялти шкулта вĕреннĕ, 5-9 классенче Чупай шкулĕнче, 10-11 классенче Г.Е.Егоров ячĕллĕ Вăрмарти вăтам шкулта ăс пухнă. Вăл яланах активлăхпа палăрса тăнă, пĕлÿ патне туртăннă, сывă пурнăç йĕркине тытса пынă, спортпа туслă пулнă. Ахальтен мар йĕлтĕрпе чупассипе Раççей спорт мастерĕн ятне тивĕçнĕ. Спортăн ытти тĕсĕсем те уншăн ют пулман.
Владимир Хусанти танк училищине вĕренсе пĕтернĕ, Раççей Федерацийĕн Хĕç-Пăшаллă вăйĕсенче контрактпа службăра тăнă. 24 çултах танк взвочĕн командирĕ пулса тăнă. Умне лартнă задачăсене пурнăçланăшăн Суворов медальне тивĕçнĕ, анчах та ăна алла илсе ĕлкĕреймен, тан мар çапăçура вилмеллех аманнă. Хăюлăхпа паттăрлăх кăтартнăшăн, РФ Президенчĕн Хушăвĕпе килĕшÿллĕн, танк батальонĕн танк ротин танк взвочĕн командирне, гвардин аслă лейтенантне Владимир Петрович Сергеева «Хăюлăхшăн» орденпа /Орден Мужества/ наградăланă.
Ăмăртусен торжествăлла пайĕ ялти тĕп шкул умĕнче иртрĕ. Унта Хусанти танк училищин курсанчĕсем те хутшăнчĕç /ÿкерчĕк çинче/. Пухăннисен умĕнче Вăрмар муниципаллă округĕн администрацийĕн пуçлăхĕ В.Шигильдеев, ЧР физкультурăпа спорт министрĕн заместителĕ А.Чернов, Хусанти танк училищин выпускникĕ, Владимир Петрович Сергеевпа пĕрле çар тивĕçне пурнăçланă С.Мышкин, Хусанти танк училищин преподавателĕ, рота командирĕ С.Сергеев капитан, тинĕс пехотин подполковникĕ, çар ĕçĕсен ветеранĕ А.Жилов, саппасри подполковник М.Пуклаков, Тихвински Турамăш турăшĕн Мăнçырмари чиркĕвĕн настоятелĕ Л.Ермолаев протоиерей тухса калаçрĕç.
Вĕсем Владимир Сергеевăн хăюлăхĕ пуриншĕн те, çав шутра çамрăк ăрушăн та, тĕслĕх вырăнĕнче пулнине каларĕç, унăн ячĕ нихăçан та манăçмĕ тесе палăртрĕç, ашшĕпе амăшне çакăн пек паттăр ывăлшăн тав турĕç. Ăмăртăва хутшăнакансене йĕлтĕр йĕрне парăнтарма, финиша ăнăçлă çитме иксĕлми хавхаланупа вăй-хал сунчĕç.
Владимир Сергева асăнса шăплăх минучĕ пулчĕ. Унтан пухăннисем паттăр ячĕпе уçнă асăну хăми умне чĕрĕ чечексем хучĕç.
Малалла ăмăртусем пуçланчĕç. Йĕлтĕрçĕсем çул ÿсĕмне кура ушкăнăн-ушкăнăн черетпе чупрĕç. 2014 çулта çуралнă арçын ачасемпе хĕрачасенчен пуçласа 69 çулти хĕрарăмсемпе арçынсем таранах йĕлтĕр спортĕнчи пултарулăхне тĕрĕслеме пултарчĕç.
Ăмăртакансем хушшинче Владимир Сергеевăн йăмăкĕ Иустиния та пулчĕ. Маттур хĕрача хăйĕн çул ÿсĕмĕнчи йĕлтĕрçĕсене /2009-2010 çулсенчи хĕрачасем/ чылай хыçала хăварса финиша чи пĕрремĕш çитрĕ, пиччĕшĕ пекех спортра пултаруллă пулнине çирĕплетрĕ, çĕнтерÿ пьедесталĕн 1-мĕш картлашки çине хăпарма тивĕçрĕ /ÿкерчĕк çинче/. 2-мĕш вырăна А.Яковлева /Пысăк Енккасси\, 3-мĕш вырăна В.Григорьева /Кĕлкеш/ тухрĕç.
2014 çулхи хĕрачасем хушшинче В.Данилова /Чупай/, П.Вавилова /Чупай/, Д.Иванова /Пинер/ çĕнтерчĕç. 2013 çулхисем хушшинче А.Андреева /Чупай\, Ю.Леонтьева /Чупай/, Е.Измукова /Пинер/ палăрчĕç. 2011-2012 çулхисем хушшинче М.Сереброва /Чупай/, А.Захарова /Чупай/, К.Афанасьева /Шăхаль/ маттур пулчĕç.
2007-2008 çулхисем хушшинче А.Егорова /Чупай/, К.Скворцова /Чупай/, С.Никитина /Кивĕ Вăрмар/ мала тухрĕç. 2005-2006 çулхисем хушшинче А.Егорова /Чупай/, М.Сереброва /Чупай/, Ю.Матвеева /Вăрмар поселокĕ/ çĕнтерчĕç.
18-29 çулти хĕрарăмсем хушшинче А.Григорьева /Энĕшпуç/ тата А.Теплова /Патти/, 30-39 çултисем хушшинче Р.Васильева /Чупай/ тата А.Васильева /Чупай/, 40-49 çултисем хушшинче Л.Скворцова /Патти/, 50-59 çултисем хушшинче С.Егорова /Чупай/, 60-69 çултисем хушшинче М.Николаева /Чупай/ палăрчĕç.
2014 çулхи арçын ачасем хушшинче А.Васильев /Чупай/, П.Петров /Чупай/, А.Павлов /Чулкас/ мала тухрĕç. 2013 çулхисем хушшинче С.Чернов /Пинер/, Я.Федотов /Чулкас/, К.Димитриев /Чупай/ çĕнтерчĕç. 2011-2012 çулхисем хушшинче Я.Михайлов /Пинер/, Д.Бурьянов /Энĕшпуç/, Д.Михайлов /Чупай/ малта пулчĕç. 2009-2010 çулхисем хушшинче Н.Александров /Энĕшпуç/, А.Артемьев /Чулкас/, А.Иванов /Пысăк Енккасси/ палăрчĕç. 2007-2008 çулхисем хушшинче Н.Никифоров /Энĕшпуç/, А.Егоров /Чупай/, Д.Павлов /Чулкас/ мала тухрĕç. 2005-2006 çулхисем хушшинче М.Архипов /Хусанти танк училищи/, М.Николаев /Чупай/, Н.Александров /Энĕшпуç/ çĕнтерчĕç.
18-29 çулти арçынсем хушшинче — К.Балаганский /Хусанти танк училищи/, Е.Сметанин /Кивĕ Вăрмар/, Н.Никитин /Хусанти танк училищи/, 30-39 çултисем хушшинче — С.Елаков /Чупай/, А.Топтыгин /Чупай/, Е.Ушмарин /Тăрмăш/, 40-49 çултисем хушшинче — А.Степанов /Вăрмар поселокĕ/, Э.Мясников /Кивĕ Вăрмар/, П.Порфирьев /Уйкас/, 50-59 çултисем хушшинче М.Гаврилов /Чупай/, А.Денисов /Тупах/, В.Васильев /Кивĕ Вăрмар/, 60-69 çултисем хушшинче Н.Павлов /Чулкас/, В.Федоров /Чупай/, В.Паденьков /Чулкас/ палăрчĕç.
Çĕнтерÿçĕсемпе призерсене грамотăсемпе тата медальсемпе наградăларĕç, парнесем парса хавхалантарчĕç.
Спорт мероприятине лайăх йĕркелесе ирттернине палăртмалла. Йĕлтĕр трассине тивĕçлĕ шайра хатĕрленĕ. Спортсменсем хăйсене мĕнле туйнине тимлесе медицина ĕçченĕ сыхă тăчĕ. Финиша тухакансене пурне те вĕри чейпе тата пĕчĕк кукăльсемпе кĕтсе илчĕç. Çамрăк волонтерсем те пурне те пулăшма хатĕр пулчĕç.
Çакăн пек пысăк мероприятисене «Демографи» наци проекчĕн «Спорт — пурнăç норми» федераллă проекчĕ шайĕнче йĕркелесе ирттереççĕ. Массăллă спорт ăмăртăвĕсене хутшăнакансен, сывă пурнăç йĕркипе туслă çынсен йышĕ çулсерен ÿссе пыни наци проектĕнче палăртнă тĕллевсем ăнăçлăн пурнăçланса пынине туллин çирĕплетет.
И.ДАНИЛОВА.
