Чăваш Республикин Пуçлăхĕ Олег Николаев кăçал Чăваш Республикин Патшалăх Канашне янă Çырăвĕнче: «Телейлĕ ачалăх çулталăкĕн тĕп тĕллевĕ — кашни ачана пайăр аталану çул-йĕрĕпе килĕшÿллĕн комплекслăн пулăшса пымалли тытăм туса хурасси», — тенĕ.
Телейлĕ ачалăх çулталăкне торжествăлла лару-тăрура уçнă мероприятинче те Олег Алексеевич ачасем пирĕн пуласлăх пулнине, вĕсене пурнăçра хăйсен вырăнне тупма пулăшмаллине палăртнă. Пысăк мероприятине Вăрмар муниципаллă округĕн представителĕсем те хутшăннă, çав шутра В.Д.Николаев ячĕллĕ Мăнçырмари пĕтĕмĕшле пĕлÿ паракан вăтам шкулта вĕренекенсем пулнă. Вĕсем çак кун Мускаври автомобильпе çул-йĕр патшалăх техника университечĕн Атăлçи филиалĕнче пулса курнă.
«Çак вĕрентÿ учрежденийĕнче пире питĕ килĕшрĕ. Эпир «Çул-йĕр правилисене пĕлетпĕр-и?» интеллектлă вăййа хутшăнтăмăр. Вăйăра 7 станци пулчĕ: «Тупмалли юмахăн тупсăмне туп», «Юрать, юрамасть», «Ребуссем», «Паллăсене пуçтар», «Çул тăваткалĕнче паллăсем лартса тух», «Чи илемлĕ фликер шутласа туп» тата чи интересли — «Маттур водитель» /самокатсемпе ярăнасси\», — каласа параççĕ Мăнçырма шкулĕнче вĕренекенсем.
Вăййа учреждени преподавателĕсем ирттернĕ. Вĕренекенсем çул-йĕр правилисене лайăх пĕлнине кăтартнă. «Эпир вăйăпа та кăмăллă юлтăмăр, хамăрăн пĕлĕве те ÿстертĕмĕр, — теççĕ ачасем. — Ун хыççăн «Шупашкар — Арена» пăр керменĕнче Телейлĕ ачалăх çулталăкне уçнă çĕре хутшăнтăмăр. Мероприяти питĕ интереслĕ иртрĕ, вăл пире тыткăна илчĕ. Куракансене тĕрлĕ тематикăллă блоксемпе паллаштарчĕç: спорт, туризм, йăла-йĕрке, IT-технологисем тата техникăллă пултарулăх, патриотлăх, çемье хаклăхĕсем, наставниксем тата вĕрентекенсем».
Паллах, ачасемпе пĕрле вĕсен вĕрентекенĕсем те пулнă. Мăнçырма шкулĕнче чăваш чĕлхипе литературине вĕрентекен Татьяна Леонарьевна Цыркунова палăртнă тăрăх, мероприятине хутшăнни вĕренекенсемшĕн пысăк пĕлтерĕшлĕ. Кадетсемпе юнармеецсен парачĕ, IT-технологисен презентацийĕ, спорт, культура блокĕсем тата ытти те ачасен асĕнче хăйсен вырăнне тупса вĕренÿре çитĕнÿсем тума, пурнăçра çĕнĕрен те çĕнĕ çĕнтерÿсем патне ăнтăлма хавхалантарнă.
Ирина ДАНИЛОВА
