Çĕрпÿри 2 номерлĕ пĕтĕмĕшле пĕлÿ паракан вăтам шкулта В.М. Воротников контр-адмирала халалласа «Служу России» ятпа кадетсен çарпа патриотлăх тата художество пултарулăхĕн республика шайĕнчи I уçă фестиваль-конкурсĕ иртнĕ.
Çак кун шкулта савăнăçлă лару-тăру хуçаланнă, мероприятине чăннипех те юрă-кĕвĕ, ташă, ăслăлăх пултарулăхĕн уявĕ теме пулать. Фестиваль-конкурсăн торжествăлла пайĕнче пухăннинсен умĕнче саламлă сăмахпа Çĕрпÿ муниципаллă округĕн пуçлăхĕ Алексей Иванов, унăн заместителĕ — вĕрентÿпе социаллă аталану пайĕн начальникĕ Алла Волчкова, çамрăксене çарпа патриотлăх воспитанийĕ парассипе ĕçлекен «Авангард» вĕрентÿпе методика центрĕн директорĕ Александр Мокрушин, шкул директорĕ, РФ тата ЧР тава тивĕçлĕ вĕрентекенĕ Татьяна Кузьмина, Çĕрпÿ, Красноармейски, Куславкка тата Вăрмар муниципаллă округĕсен çар комиссарĕ Валерий Буклаков тата ыттисем те тухса калаçнă. Вĕсем фестиваль-конкурсăн пĕлтерĕшĕ пысăк пулнине, патриотла мероприятисене хутшăнни çитĕнекен ăрăва мĕн пĕчĕкрен Тăван çĕршыва юратма хăнăхтарнине палăртнă.
Фестивале Çĕрпÿ, Вăрмар, Комсомольски, Красноармейски, Вăрнар, Елчĕк муниципаллă округĕсенчи кадет шкулĕсен тата кадет класĕсен представителĕсем хутшăннă. Кадетсен вальсĕ, чăваш ташши, матроссен ташши, кашăкпа калакансен ансамблĕ, хĕрсен ташши куракансене те, жюри членĕсене те питĕ килĕшнĕ. Конкурсра Раççей, мирлĕ пурнăç çинчен юрăсем янăранă. Ăслăлăхпа практика конференцийĕнче ятарлă çар операцийĕн паттăрĕсем, паллă ентешсем çинчен ĕçсем пулнă. Фестиваль пĕтĕмлетĕвĕ тăрăх çĕнтерÿçĕсемпе призерсене палăртнă, вĕсене грамотăсемпе, кубоксемпе, медальсемпе чысланă.
Пĕлтерме кăмăллă, фестиваль-конкурсра Г.Е.Егоров ячĕллĕ Вăрмарти пĕтĕмĕшле пĕлÿ паракан вăтам шкулта вĕренекенсем призерсем пулса тăнă. Шкулти «Ложкари» ансамбль «Ташă» номинацинче хăйсен çул ÿсĕмĕнчи ачасем хушшинче 3-мĕш вырăна тивĕçнĕ. Ансамбль руководителĕ — Владимир Павлович Антонов.
Наталия СМЕТАНИНА, кадетсен 5б класĕн руководителĕ.
