Вăрмар муниципаллă округĕнчи вĕрентÿ учрежденийĕсен шкул хаçачĕсем каллех çитĕнĕвĕсемпе тĕлĕнтереççĕ. Вĕсем шкул хаçачĕсен регионсем хушшинчи «Школа-пресс-2023» творчествăлла конкурсра черетлĕ хут палăрнă.
«Ялти шкулăн чи лайăх хаçачĕ» номинацире Г.Е.Егоров ячĕллĕ Вăрмарти пĕтĕмĕшле пĕлÿ паракан вăтам шкулта тухакан «Голос школы» хаçат /руководителĕ Е.И.Ларионова/ 2-мĕш вырăна тивĕçнĕ. Пысăк Енккассинчи пĕтĕмĕшле пĕлÿ паракан вăтам шкулта тухакан «Перекресток» хаçат /руководителĕсем А.П.Григорьевăпа Г.В.Алексеева/ 3-мĕш вырăна йышăннă.
Кăçал конкурса çĕршывăн вун-вун регионĕнчи çамрăк журналистсем йышлăн хутшăннă. Унăн финалĕ Çĕнĕ Шупашкар хулинче Ачасемпе çамрăксен пултарулăхĕн аталанăвĕн центрĕнче иртнĕ. Чыслав церемонине ЧР цифра аталанăвĕпе информаци политикин тата массăллă коммуникацисен министрĕ Михаил Степанов, ЧР Пуçлăхĕн пресс-секретарĕ Борис Краснов, ЧР Патшалăх Канашĕн председателĕн заместителĕ Ольга Петрова, Çĕнĕ Шупашкар хулин администрацийĕн пуçлăхĕ Дмитрий Пулатов хутшăннă. Вĕсем çĕнтерÿçĕсемпе призерсене наградăланă, çавăн пекех ачасемпе мастер-классем ирттернĕ.
«Голос школы» тата «Перекресток» хаçатсен юнкорĕсене мероприятинче питĕ килĕшнĕ. Вĕсем Дипломсене кăна мар, хăйсен редакцийĕсен ĕçĕ-хĕлĕ çинчен телесюжет ÿкерме Чăваш наци телерадиокомпанийĕн сертификачĕсене те тивĕçнĕ.
Ирина ДАНИЛОВА хатĕрленĕ
