Поселока тирпей-илем кĕртесси кунран-кун вăй илсе пычĕ. Çынсем тăван тăрăха тасалăхпа илемлĕх кÿрес ырă ĕçе активлă хутшăнаççĕ. Территорисене ăпăр-тапăртан тасатассине ĕç коллективĕсем, шкулта вĕренекенсемпе ĕçлекенсем, уйрăм кил-çуртсемпе нумай хваттерлĕ çуртсенче пурăнакансем — пурте активлă хутшăнаççĕ.
Вăрмар муниципаллă округĕн администрацийĕн ĕçченĕсем те çурхи субботнике тухрĕç иртнĕ кунсенче. Алла ĕç хатĕрĕсем тытса кашниех администраци çурчĕ çывăхĕнчи территорие йĕркене кĕртрĕç, пĕлтĕрхи хыт-хурана, çулçăсене, хĕл каçа пухăннă ăпăр-тапăра пуçтарчĕç.
Вăрттăнлăх мар ĕнтĕ, пурин те таса урамсемпе утас, тирпейлĕ ача-пăча лапамĕсемпе скверсенче канас, илемлĕ чечек клумбисемпе киленес килет. Тирпейсĕрлĕх вара кăмăла хуçать. Çавăнпа та пурин те пĕр-пĕрне хисеплесчĕ, хамăртан кăна килекен йĕркене пăхăнасчĕ!
Сăнÿкерчĕкпе тексчĕ Надежда ШИШКИНАН
