Вăрмар муниципаллă округĕнче пĕрремĕш хут старостăсен слетне йĕркелесе ирттерчĕç. Пĕр-пĕринпе пуçтарăнса сÿтсе явмалли ыйту чылай пуçтарăннă. Мероприятие ертсе пыраканĕ, çĕнĕлле каласан модераторĕ, Вăрмар муниципаллă округĕн администрацийĕн мобилизаци хатĕрленĕвĕн, ятарлă программăсен тата гражданла хÿтĕлевпе чрезвычайлă лару-тăру пайĕн начальникĕн тивĕçĕсене пурнăçлаканĕ Юрий Ефимов пулчĕ. Староста вăл — ялти чи активлă, хăй хыççăн ертсе пыма пултаракан çын. Вĕсем территори пайĕсен пуçлăхĕсене пулăшаканĕсем, ялти лару-тăрăва пĕлсе тăраканĕсем. Çав вăхăтрах вĕсем хăйсен ĕçне тÿлевсĕр пурнăçлакан общественниксем. Вăрмар округĕнче хальлĕхе 49 староста.
Мероприятие уçнă май Вăрмар муниципаллă округĕн администрацийĕн пуçлăхĕ Василий Шигильдеев активлăхĕпе палăрнă старостăсене администрацин Тав çырăвĕсемпе, парнепе чысларĕ. Тав çырăвне Пăвакассинчи Татьяна Александровна Александрова, Саруйĕнчи Владимир Петрович Ефимов /ÿкерчĕк çинче/, Пысăк Енккассинчи Вячеслав Михайлович Сергеев тивĕçрĕç. Хăйсен пархатарлă ĕçĕпе вĕсем ыттисемшĕн тĕслĕхре.
Слета ял старостисемсĕр пуçне депутатсем, округри территорисен пайĕсен пуçлăхĕсем, Вăрмар муниципаллă округĕн администрацийĕн секторсен заведующийĕсем тата ыттисем те хутшăнчĕç.
Старостăсен ĕçĕ ялта пĕлтерĕшлĕ пулнине палăртса Вăрмар муниципаллă округĕн депутачĕсен Пухăвĕн председателĕ Юрий Иванов, Вăрмарсен Шупашкарти ентешлĕхĕн президенчĕ Иван Аверьянов сăмах каларĕç.
«Старостăсен право статусĕ» повесткăри пĕрремĕш ыйтупа муниципаллă округăн администрацийĕн пуçлăхĕн заместителĕн - организаципе контроль тата аналитика ĕçĕн пайĕн начальникĕн тивĕçĕсене пурнăçлаканĕ Юрий Михеев тухса калаçрĕ.
Ялсенче пушар хăрушсăрлăхĕпе тивĕçтермелли профилактика мероприятийĕсем пирки Вăрмарти надзорпа профилактика ĕçĕн пайĕн начальникĕ Сергей Григорьев паллаштарчĕ. Пирĕн районта çак вăхăт тĕлне кăçал 17 пушар пулнă /пĕлтĕр — 4/, ытларах мунча, типĕ курăк çуннипе çыхăннисем. Çынсем час-часах типĕ курăка чĕртсе яраççĕ, çак сăлтава пула пушар машини кашни кунах çулăма сÿнтерме çула тухать.
Вăрмар муниципаллă округĕн пуçлăхĕн заместителĕн — АПК аталанăвĕпе экологи пайĕн начальникĕн тивĕçĕсене пурнăçлаканĕ Василий Адюков районта экологи субботникĕсем ирттересси, масарсене тасатасси пирки тухса калаçрĕ. Пысăк ялсенче темиçе староста пулсан та аван пулнине палăртрĕ вăл.
Вăрмар муниципаллă округĕнче пĕчĕк ялсен кунĕсене — ял уявĕсене ирттересси пирки администрацин культурăпа социаллă аталану тата спорт пайĕн начальникĕ Александр Краснов сăмах тухса каларĕ.
Мероприятие ертсе пыраканĕ Юрий Ефимов старостăсене территори пайĕсен пуçлăхĕсемпе, администраципе яланах çыхăну тытса тăмаллине аса илтерчĕ.
Вăрмар муниципаллă округĕн администрацийĕн пуçлăхĕ Василий Шигильдеев слета пĕтĕмлетнĕ май, пĕрлĕхре — вăй пулнине палăртрĕ, ыйтусене яланах пĕрле сÿтсе явма, критикăна та йышăнма хатĕррине каларĕ.
Эвелина МИХАЙЛОВА.
