Аслă ÿсĕмри çынсен ĕмĕрĕ вăрăм та активлă ирттĕр тесе, сывлăхне çирĕплетес тĕллевпе вĕсене физкультурăпа спорта явăçтарма тата ГТО комплексне сарма Ачасемпе çамрăксен Вăрмарти спорт çуртĕнче тата «Илем» физкультурăпа спорт комплексĕнче пенсионерсем хушшинче шывра ишессипе, сĕтел çинчи теннис, дартс вăййисемпе тата «Ĕçпе хÿтĕлеве хатĕр» Пĕтĕм Раççейри физкультурăпа спорт комплексĕн нормативĕсене пурнăçлассипе «Демографи» наци проекчĕн «Аслă ăру» проекчĕпе килĕшÿллĕн «Активлă вăрăм ĕмĕр» /«Активное долголетие»\ фестиваль иртрĕ. Фестивале 60 çулти тата 60 çултан аслăрах арçынсене, 55 çулти тата 55 çултан аслăрах хĕрарăмсене хутшăнма ирĕк панă. Ăмăртусене Чупай, Кавал, Кивĕ Вăрмар, Пинер ялĕсенчи тата Вăрмар поселокĕнчи аслă ÿсĕмри çынсем хутшăнчĕç.
Мероприятие хутшăнакансене Вăрмар муниципаллă округĕн пуçлăхĕ Василий Шигильдеев, Раççей пенсионерĕсен Союзĕн Вăрмарти уйрăмĕн председателĕ Галина Алексеева, вăрçăпа ĕç ветеранĕсен Канашĕн Вăрмарти уйрăмĕн председателĕ Людмила Голубева, Вăрмар муниципаллă округĕн администрацийĕн культура, социаллă аталану тата спорт пайĕн начальникĕ Александр Краснов, Вăрмарти ачасемпе çамрăксен спорт шкулĕн директорĕ Сергей Архипов саламларĕç, спорт сывлăха çирĕплетнине кăна мар, пĕр-пĕринпе хутшăнма, туслăха çирĕплетме, пĕр-пĕрне ăнланма пулăшаканĕ те пулнине палăртрĕç. Вĕсем фестивале хутшăнакансене пурне те спортпа туслă пулнăшăн, сывă пурнăç йĕркине пропагандăланăшăн тав турĕç, малашнехи пурнăçра ăнăçу сунчĕç.
Çĕнтерÿçĕсемпе призерсене медальсемпе, дипломсемпе чысларĕç. ГТО нормативĕсене пурнăçлассипе хĕрарăмсем хушшинче Людмила Голубева – пĕрремĕш, Нина Семенова иккĕмĕш, Галина Алексеева виççĕмĕш, арçынсем хушшинче Геннадий Андреев — пĕрремĕш, Виталий Федоров – иккĕмĕш, Александр Тимофеев – виççĕмĕш пулчĕç. Сĕтел çинчи теннисла выляса Людмила Голубева — пĕрремĕш, Ираида Огурцова – иккĕмĕш вырăнсене тивĕçрĕç, арçынсем хушшинче Владимир Евгеньева çитекенни пулмарĕ, иккĕмĕш Михаил Филиппов, виççĕмĕш Виталий Федоров пулчĕç.
Шывра ишессипе хĕрарăмсем хушшинче Светлана Егорова пĕрремĕш, Людмила Голубева иккĕмĕш, Зоя Маркова виççĕмĕш, арçынсем хушшинче Олег Иванов пĕрремĕш, Юрий Харитонов иккĕмĕш, Александр Тимофеев виççĕмĕш вырăнсене тивĕçрĕç. Дартс вăййипе хĕрарăмсем хушшинче пĕрремĕш вырăна Мираида Симонова, иккĕмĕш вырăна Ираида Огурцова, виççĕмĕш вырăна Зоя Маркова йышăнчĕç. Арçынсем хушшинче дартс вăййипе ăмăртса Александр Тимофеев пĕрремĕш, Вячеслав Табаков иккĕмĕш, Геннадий Андреев виççĕмĕш пулчĕç.
Ирина Дмитриева, физкультура енĕпе ĕçлекен инструктор
