Шăрăх çанталăк тăнă май пушарсенчен сыхланас ыйту çивĕч тăрать. Вăрман фончĕн территорийĕнче пушар тухасран та питĕ асăрхануллă пулмалла. Пĕлтĕр республикăра типĕ курăка, çÿп-çапа çунтарнă май пушарсем пулнă, пурĕ 4,79 гектар çинче 10 вăрман пушарне регистрациленĕ, кăçал сыхлăха пушшех пысăклатмалла.

Çак тапхăрта вăрмансенче çÿреме чараççĕ, кăвайт чĕртме, типĕ курăк çунтарма юрамасть. Вăрман çывăхĕнче граждансен пушар хăрушсăрлăхĕн правилисене çирĕп пăхăнмалла: сÿнмен шăрпăка, пирус тĕпне, кĕленче ванчăкĕсене вăрманта хăвармалла мар. Уяр çанталăкра пĕчĕк хĕлхем те пысăк пушара çаврăнма пултарать.

Вăрмансен çывăхĕнчи çарансенче çулăм тухсан та вăл йывăçсем çине куçма пултарать. Техника çăвне, бензина, краççына ятарлă вырăнта çеç тымалла. Ĕçлекен техника çывăхĕнче вут та, пирус та чĕртмелле мар. Вăрман çумĕнчи лаптăксене 0,5 метртан кая мар сарлакăш сухаламалла.

Пушар хăрушсăрлăхĕн правилисене пăсакансене пысăк штраф тÿлеттереççĕ. Пĕлтĕр республикăра унашкаллисем тĕлĕшпе икĕ теçетке протокол çырнă.

ЧР Çутçанталăк ресурсĕсен тата экологи министерстви пĕлтернĕ тăрăх, вăрмансенче пушарсем пуласран асăрханассине, вут-çулăмпа кĕрешессине йĕркелеме кăçал 25 миллион тенкĕ уйăрнă — иртнĕ çулхинчен нумайрах. 313 çынран 48 команда йĕркеленĕ, пĕтĕм техника юсавлăхне тĕрĕсленĕ.

Юрий ЕФИМОВ, Вăрмар муниципаллă округĕн администрацийĕн мобилизаци хатĕрлевĕн, ятарлă программăсен, гражданла оборонăпа чрезвычайлă лару-тăру пайĕн начальникĕ