Çутçанталăкăн чи савăнăçлă та кĕтнĕ тапхăрĕ — хĕвеллĕ çулла — çитрĕ. Шкул ачисем çуллахи каникул вăхăчĕпе киленеççĕ, кашни минутпа туллин усă курса юлма тăрăшаççĕ.
Кам ăçта канать: пĕрисем — килтех, теприсем — асламăшĕ е кукамăшĕ патĕнче, нумайăшĕ лагерьсенче канса сывлăхне çирĕплетет. Вăрмар муниципаллă округĕнчи «Романтика» канупа сывлăха çирĕплетмелли лагерь те хăйĕн алăкĕсене тараватлăн уçрĕ. 1-мĕш сменăра канма кунта 76 воспитаннике йышăннă. Смена уçăлнă ятпа, Чăваш Енре Телейлĕ ачалăх çулталăкĕ пулнине халалласа лагерьте савăнăçлă мероприяти иртрĕ.
Ачасене çуллахи каникул çитнĕ ятпа саламлама, хăйсен вăхăтне усăллăн та тухăçлăн ирттерме сунма Вăрмар муниципаллă округĕн пуçлăхĕн социаллă ыйтусемпе ĕçлекен заместителĕн — вĕрентÿпе çамрăксен политикин пайĕн начальникĕн тивĕçĕсене пурнăçлаканĕ Виктор Павлов, Вăрмар муниципаллă округĕн администрацийĕн пуçлăхĕн çамрăксемпе ĕçлекен канашçин тивĕçĕсене пурнăçлаканĕ Надежда Борисова, Чăваш Енри хĕрарăмсен Союзĕн Вăрмарти уйрăмĕн руководителĕ Валентина Волкова, Чăваш Енри ачасен прависене хÿтĕлессипе ĕçлекен уполномоченнăйĕн обществăлла пулăшуçи Ирина Алексеева килсе çитрĕç.
Çул ÿсĕмне кура виçĕ отряда пайланнă ачасем вожатăйĕсемпе пĕрле хăйсен корпусĕсем патĕнчен утса килчĕç, пĕр рете тăрса тухрĕç. РФ тата ЧР гимнĕсене итлесе патшалăх ялавĕсене çĕкленĕ хыççăн яваплă çынсем сăмах илчĕç. Вĕсем ачасене çĕнĕ юлташсем тупма, лайăх канса сывлăха çирĕплетме сунчĕç, çакăн валли кунта мĕнпур услови пуррине палăртрĕç, ача чухне хăйсем те лагерьсенче каннине, çав кунсене ырă туйăмпа аса илнине каларĕç. Лагерь директорĕ Сергей Максимов лагерьте хăтлă пултăр тесе «Вĕрентÿ» наци проекчĕ шайĕнче юсав ĕçĕсем ирттернине палăртрĕ, ачасене тĕрлĕ кăсăклă мероприятисем кĕтнине пĕлтерчĕ. Унтан кашни отряда мечĕксем, сĕтелçи теннис вылямалли хатĕрсем, ытти парнесем пачĕç.
Ачасем хăйсен отрячĕсен ячĕсемпе /вĕсем питĕ интереслĕ вара — «Комета Дружба», «220 Вольт», «Пупсики»\, девизĕсемпе, вожатăйĕсемпе паллаштарчĕç. Торжествăлла линейка ачасен флешмобĕпе вĕçленчĕ.
Ирина ДАНИЛОВА
