Çак кунсенче Чăваш Ен Пуçлăхĕ Олег Николаев республикăра пурăнакан, хăйсен ĕçĕнче палăрнă 23 çынна патшалăх наградисем панă.
Вĕсен хушшинче — Раççей Геройĕ, ял хуçалăх тата вăрман отраслĕн ĕçченĕсем, врачсем, предприятисен руководителĕсем, журналистика сообществин представителĕсем, педагогсем, тренерсем. Пурте вĕсем республикăн социаллă-экономикăллă аталанăвне пысăк тÿпе хывнă.
Вăрмарти тĕп больницăн врачĕ те — Елена Николаевна Чапурина акушер-гинеколог пысăк награда илме тивĕçнĕ. Ăна «Чăваш Республикин тава тивĕçлĕ врачĕ» хисеплĕ ят панă. Саламлатпăр!
Елена Николаевна И.Н.Ульянов ячĕллĕ Чăваш патшалăх университетĕнчи медицина факультетне вĕренсе пĕтернĕ. 1990 çултанпа Вăрмарти тĕп больницăра акушер-гинекологра ĕçлет. Тÿрĕ кăмăлпа вăй хунăшăн, хăйĕн профессине чунпа парăннăшăн ăна ЧР Сывлăх сыхлавĕн министерствин Тав хучĕпе тата Хисеп грамотипе, РФ Сывлăх сыхлавĕн министерствин Хисеп грамотипе тата ытти наградăсемпе чысланă.
