«Кашни киле — хаçат-журнал» девизпа иртет кашни çур çулта пулакан çырăнтару кампанийĕ. Çак вăхăтра почта çыхăнăвĕн уйрăмĕсен тата редакци ĕçченĕсен хĕрÿ тапхăр пырать. Район хаçатне кашни киле çырăнтарассипе тăрăшса вăй хураççĕ вĕсем.
Хамăр мĕн ĕçленине тата районта мĕн пулса иртнине вулакансем патне çитермелле-çке пирĕн.
Хаçатра ĕçлекенсен тĕп тĕллевĕ - вулакан патне тĕрĕс те объективлă информаци çитересси, кашни номерне интереслĕ те пуян содержаниллĕ тăвасси, хаçатăн сăн-сăпатне лайăхлатса пырасси. Çак ĕçсене пурнăçлама пирĕн коллективăн ĕç опычĕ те, пултарулăхĕ те çителĕклĕ.
«Хĕрлĕ ялав» хаçата çырăнтарас, унпа вырăнти халăха тивĕçтерес ĕçре «Раççей почти» акционерсен обществин республикăри почта çыхăнăвĕн Управленийĕн Канашри почтамчĕ ĕçленине палăртмалла. Кăçалхи апрелĕн 1-мĕшĕнчен Вăрмар почта çыхăнăвне Канашри почта çыхăнăвĕн уйрăмĕ çине куçарнă. Çакă хаçат-журнал çырăнтарас ĕçре хăш-пĕр йывăрлăхсем те кăларса тăратрĕ. Вăрмар муниципаллă округĕнчи почта çыхăнăвĕн хăш-пĕр уйрăмĕсем «Хĕрлĕ ялав» хаçата кăçалхи иккĕмĕш çур çулшăн çырăнтарассипе палăртнă плана иртнĕ çулхипе танлаштарсан тултараймарĕç. Çав вăхăтрах Чупайри тата Чулкасри почта çыхăнăвĕн уйрăмĕсен почтальонĕсем кашни киле хаçат-журналпа тивĕçтерессипе уйрăмах активлăхпа палăрчĕç. Чупайĕнчи почта çыхăнăвĕн уйрăмĕн начальникĕ Татьяна Егорова, Валентина Сорокина, Валентина Яковлева, Елена Александрова почтальонсем «Хĕрлĕ ялав» хаçата çырăнтарассипе иртнĕ çулхи çак вăхăтрипе танлаштарсан плана 10 экземпляр таран ирттерсе пурнăçланă. Çавăн пекех Чулкасри почта çыхăнăвĕн уйрăмĕн начальникĕ Ольга Соколова, Татьяна Алексеева, Надежда Петрова, Людмила Иванова почтальонсем те район хыпарçине çырăнтарассипе активлăхпа палăрчĕç. «Хĕрлĕ ялав» хаçат редакцийĕ район хаçатне çырăнтарассипе ирттернĕ конкурсра шăпах вĕсем çĕнтерÿçĕсем пулса тăчĕç. «Хĕрлĕ ялав» хаçат редакцийĕ вĕсене пурне те асăнмалăх парнесем парса хавхалантарчĕ. Маттурсем, çитес çырăнтару кампанийĕнче те активлăхпа палăрасса шансах тăратпăр.
Палăртма кăмăллă: Вăрмар муниципаллă округĕн пуçлăхĕ Василий Шигильдеев «Хĕрлĕ ялав» хаçата округри 16 территори пайне çырăнса пачĕ.
Район хаçачĕпе предприятисемпе организацисем, хресчен /фермер\ хуçалăхĕсем, уйрăм çын предпринимательсем те туслă çыхăну тытаççĕ. Вăрмар райповĕ, «Вăрмарти механика завочĕ» акционерсен уçă обществи, «АкваМир» тулли мар яваплă общество, «Светлана», «Вăрмарти çĕвĕ фабрики «ОВАС» тулли мар яваплă обществăсенче вăй хуракансем, «Урмарытеплосеть» муниципаллă унитарлă предприяти, «Выльăх-чĕрлĕх чирĕсемпе кĕрешекен Вăрмарти станци» бюджет учрежденийĕ, Г.Ямуков, Н.Иванов, В.Иванов хресчен /фермер\ хуçалăхĕсем «Хĕрлĕ ялав» хаçата çырăнчĕç. «Вăрмарти тырă йышăнакан пункт», «Мой дом», «Лидер», «Татьяна» суту-илÿ центрĕсем, Э.Грачев, Е.Молостовкина уйрăм çын предпринимательсем тата ыттисем те район хыпарçиллĕ пулчĕç.
Малашлăхра районти ытти предприятисемпе организацисем, уйрăм çын предпринимательсем, хресчен /фермер\ хуçалăхĕсем «Хĕрлĕ ялавпа» тачă çыхăну тытасса шансах тăратпăр.
Зинаида ПАВЛОВА
