«Тăван çĕршывăн хÿтĕлевçисем» Патшалăх фончĕн Чăваш Республикинчи филиалĕнче пĕрремĕш уйăхри ĕç-хĕле пĕтĕмлетнĕ.
Асăннă фондăн тĕп тĕллевĕ — ятарлă çар операцийĕн ветеранĕсене тĕрлĕ енлĕ пулăшасси, медицина тата социаллă реабилитаципе, эмелсемпе, психологи пулăшăвĕпе тивĕçтересси, санаторисемпе курортсене сыватма ярасси тата ытти те. Çавăн пекех фонд ветерансене ĕç тупма, вĕренме кайма пулăшать.
Филиал ĕçлеме пуçланăранпа кунта 320 ытла ыйтупа пынă. Ытларах чухне çынсене тĕрлĕ пулăшу мерисем кăсăклантараççĕ: документсем пуçтарса парасси, ветеранăн е çар ĕçĕсен инваличĕн статусне илесси, медицина реабилитацийĕ тата ытти те. Вĕсен ыйтăвĕсене пурне те шута илнĕ.
«Тăван çĕршывăн хÿтĕлевçисем» фондăн республикăри филиалĕн руководителĕ Елена Зайцева палăртнă тăрăх, фонд командинче тĕрлĕ профильлĕ ĕçченсем вăй хураççĕ. Вĕсем тăрăшнипе кашни ыйтăва пĕтĕм енчен тишкерсе татса пама пулать. Каларăмăр ĕнтĕ, çынсем пулăшу мерисемпе интересленеççĕ, çыхăнăва тухман салтаксен амăшĕсемпе мăшăрĕсем пырса вĕсене тупма ыйтаççĕ, ятарлă çар операцине хутшăннине çирĕплетекен удостоверенине илес йĕркен темине час-часах çĕклеççĕ. Фонд филиалĕн ĕçне регионти кашни округрах йĕркеленĕ, анчах та ыйтусен 45 проценчĕпе Шупашкарти тĕп офиса пынă.
«Пирĕн пата килнĕ кашни çынна эпир пĕтĕм енчен пулăшу кÿме, вĕсен ыйтăвĕсене татса пама тăрăшатпăр», — тет Шупашкар хулинчи социаллă координатор Галина Рязанова. Акă, килне аманса таврăннă пĕр салтака ахаль костыльсене чавсаланса утмалла хальхи йышши модель çине улăштарса панă. Теприне психолог пулăшăвĕ кирлĕ пулнă — вăл çывăрайманнипе аптăранă. Çавăн пекех ятарлă çар операцине хутшăнаканăн ачине аслă вĕренÿ заведенине квотăпа вĕренме кĕме справка илме пулăшнă.
Патшалăх фончĕн филиалĕ обществăлла проектсене пурнăçлас тата çамрăксене патриотла воспитани парас тĕлĕшпе те активлă ĕçлет. Отпуска килнĕ салтаксемпе тĕлпулусем ирттернĕ май вĕсем хăйсен ачисене шкулта тÿлевсĕр апатлантарнишĕн, кружоксене çÿреме май панишĕн, çавăн пекех хăйсене гуманитарлă пулăшу кÿнишĕн тав тунă. «Эпир хамăра пулăшнине, пирĕн çĕнтерĕве ĕненнине, пире тăван тăрăхра кĕтнине туйса тăратпăр», — тенĕ вĕсем.
Аса илтеретпĕр, фондăн филиалĕсем çĕршывăн кашни регионĕнче майăн 30, 31-мĕшĕсенче уçăлнă, июнĕн 1-мĕшĕнче ĕçе пуçăннă. «Тăван çĕршывăн хÿтĕлевçисем» Патшалăх фончĕн Чăваш Республикинчи филиалĕн социаллă координаторĕ Вăрмар муниципаллă округĕнче те ĕçлет.
Хамăр инф
